Ol Paeonia long Evri Ples
Dinis I Faenem Wan Ansa
Matres blong bed i mekem noes taem Dinis i tanem hem; hemia bankbed ia, wan antap mo wan daon. Hem i spring mo tantanem hem ful naet. !Be hem i no save slip nomo!
?Bae weswe sapos ol misinari oli rong? Dinis i stap tingting. ?Weswe sapos jos ia i no tru nomo? ?Weswe sapos mi stap long rong rod? Ol kwestin oli stap gohed blong spolem tingting blong hem.
Famli blong Dinis i bin joenem Jos tu yia bifo hem i kasem 10 yia. Taem ol misinari oli tijim olgeta blong fas taem, Dinis i bin filim se i raet long semtaem se, wanem we oli tijim, i tru. Dinis mo famli blong hem i sam long ol fas pipol blong joenem Jos long Potugal. !Dinis hem i wan paeonia!
Be, i no longtaem i pas, hem i stap wari. ?Weswe sapos, blong kasem baptaes, i no wan raet joes?
Dinis i no talem long eniwan se hem i stap wari. I no talem long ol brata o sista blong hem. Iven papa mo mama blong hem. Be long naet ia, hemia nomo hem i save stap tingting long hem.
Dinis i pulum win. Hem i luk i go daon ova long en blong bed. Ol brata blong hem oli slip finis long bed we i stap daon. Dinis i stap wekap hemwan.
Hem i save se hem i nidim blong askem God sapos Jos i tru. Hem i nildaon long medel blong bed blong hem. Hem i benem hed blong hem i go daon mo stat blong prea.
“Plis, God,” Dinis i talem long sofsof voes. “Letem mi save sapos Josef Smit i rili luk yu mo Jisas.”
Dinis i bin prea plante taem bifo. Be taem ia i defren. Dinis i wantem save tumas. Hem i prea moa strong from help.
“Mi no wantem se mi rong,” hem i talem slo long wan kwaet voes. “Mi jes wantem blong save wanem i raet.”
Afta, Dinis i filim wan samting. Filing ia i strong mo naes. I gro kasem i fulumap ful bodi blong hem. !Hem i filim olsem se bae hem i bosta wetem bigfala glad!
Dinis i save se filing ia i Tabu Spirit. God i ansarem prea blong hem. Ol misinari oli raet. Josef Smit i rili wan profet. Mo, blong kasem baptaes, i no jes wan gudfala joes. Hem i wan bes joes.
Dinis i ledaon long bak blong hem mo lukluk i go long siling. Ol wari blong hem oli go. Hem i pulum blangket blong hem i go raonem hem. Bifo hem i luksave, hem i slip.
Taem Dinis i kam bigwan, hem i oltaem tingbaot naet ia we hem i prea long bankbed blong hem. Hem i save se hem i stap long stret rod olsem wan memba blong Jos blong Jisas Kraes. Mo hem i save se Papa long Heven bae i oltaem harem ol prea blong hem.
Potugal i wan kantri long Wes Yurop.
Potugal i gat wan tempol. Oli dediketem long 2019.
Potugal i gat buk stoa we i moa olfala raon long wol.
Dinis i kasem baptaes long wan swiming pul long misin hem.
Hem i givim seves long ol aelan aotsaed long ol solwota long Spen, Potugal mo Afrika.
!Dinis mo evri brata mo sista blong hem oli givim seves long ol misin long semfala taem!
Ol pikja droing oli kam long Sammie Francis