Ol Singsing mo Ol Sop Balong
Alice i smael taem hem i stap tingting abaot Presiden Kimbol we i singsing wetem wan buluk.
Alice i kasem wan spun blong makaroni i go long bolglas blong brata blong hem. Hem i lavem ol smol brata mo sista blong hem—!olgeta faef evriwan! Mi filim gud blong helpem olgeta. Be i had blong stap olsem bigfala sista samtaem. Taem niu bebi i kam hom, hem i mas help moa plante taem. !Plante samting i stap hapen insaed long haos blong hem!
“?Wanem nao yu lanem long jos tedei?” Papa i askem.
“!Jisas!” Smol sista blong Alice i talem. Hem i kapsaetem mo flatem apol sos long plet blong hem.
Alice i smael. Sarah i naes we. Mo i save mekem naesfala mes tu.
“Mi lanem abaot Presiden Kimbol …” Alice i stat blong talem. Be afta, Mama i singaot long narafala rum. Hem i nidim Papa blong helpem hem wetem bebi.
“Sore,” Papa i talem. “Bae mi kambak.”
Taem we Papa i stap helpem Mama, Alice i helpem evri narafalawan. Eric i kapsaetem glas blong melek blong hem. Alice i klinim evriwan. Sarah i stat blong krae. Alice i haggem hem. Clara i wantem sam moa makaroni. Alice i givim sam long hem.
Iven taem Papa i kambak, kijin i gat plante noes i stap yet mo i doti. Alice i wantem se bae i moa isi blong filim pis.
Okei, lanj i finis nao. Alice i helpem ol brata mo sista blong hem blong tekem ol plet blong olgeta i go long dis blong wasem plet. Alice i no save brekem wan plet from se hem i bigwan finis. So, hem i responsibol blong wasem ol plet. Hem i fulumap dis blong wasem plet wetem wota we i gat plante sop.
Mi wantem nomo se bae mi neva save mekem ol wok blong haos, Alice i stap tingting. Afta, hem i tingbaot wanem we hem i bin lanem long Praemeri abaot Presiden Spensa W. Kimbol. Taem hem i yangfala, hem i mas mekem ol wok blong haos tu. Oltaem hem i stap singsing ol hym taem hem i stap skwisim melek blong buluk.
Alice i pikjarem Presiden Kimbol i patna wetem wan buluk blong singsing. Hem i smael.
Afta, hem i gat wan aedia. !Hem i save kam olsem wan profet! Hem i karem hymbuk mo openem i go long fas hym.
Hem i mas lego i open nomo. Alice i putum buk long saed blong windo. Hem i pusum wan saed blong buk i go biaen long wan pot plant. Afta hem i pusum narasaed en blong buk biaen long wan hevi kap. Naoia hem i save lukluk long hem taem hem i stap mekem ol wok.
Taem we Alice i stap wasem ol bolglas, ol kap mo ol spun, hem i singsing ol hym. Wom wota we i gat plante sop we i mekem balong, i filim gud long ol han blong hem. Mo ol singsing i mekem hat blong hem i hapi.
Long nekis dei, Alice i singsing bakegen. Mo nara dei afta. Hem i traem blong tingbaot ol toktok blong wanwan hym. Afta hem i muv i go long narawan. !Alice i lanem ol niufala hym tu! Hem i bin tekem lesen blong piano blong sam yia. Taem hem i no save wan hym, hem i lanem ol not long piano.
Afta sam taem, Alice i no mo wari blong stap wasem ol plet. !Samtaem hem i stap laekem! Hem i naes blong singsing mo tingting abaot Jisas. Blong stap lanem wan niu hym i olsem blong stap mitim wan niu fren. Nomata, noes blong laef i laod raon long hem, ol hym oli helpem hem blong filim pis.
Ol pikja droing oli kam long Erin Taylor