Ol Jenol blong Papa
Stori ia i hapen long Tahiti.
Allan i sidaon long wan jea aotsaed long haos blong hem. San i stap go daon. Ol pam tri oli stanap mo fesem pink mo orenj skae.
Hem i tanem ol pej blong buk we hem i stap ridim. Hem i no gat eni pikja. Be Alan i no kea sapos i no gat ol pikja. !Hem i laekem blong stap ridim buk ia!
Kwiktaem ol ae blong hem oli luk tru long klin raeting blong Papa. !Hem i tingbaot pat ia! Hemia i mekem hem i laf oltaem.
No longtaem, Papa i kam aotsaed. “?Wanem i fani tumas ia?”
“Mi stap ridim wan long ol buk blong yu.” Allan i smael. “Mi laekem pat ia abaot kokonas.”
“O, yu minim ol jenol blong mi.” Papa i sidaon kolosap long Allan. “Oli talem stori blong laef blong mi. Be oli no abaot mi nomo. Yu stap insaed long olgeta tu. Mo Mama tu, mo ol brata mo sista blong yu.”
“!Olsem Nifae!” Alan i talem. “Hem i raetem ol stori abaot laef blong hem, mo hem i raet abaot famli blong hem tu.”
“!I tru!” Papa i talem.
“Mi laekem ol pat abaot yu moa,” Allan i talem. “Olsem taem we yu wan misinari long ples ia, Tahiti.”
“Mi laekem moa ol stori abaot yu ,” Papa i talem. “Yu yu save se mifala i givim yu medel nem blong Elda Bednar?”
“!Yu neva talem hemia long mi! Mi no save wet blong ridim pat ia.”
Papa i smael. “I gat plante stori insaed long jenol blong mi. Mi bin stap raet long ol jenol taem mi gat eit yia.”
“Taem yu gat eit yia?” Allan i askem. “Hemia i longtaem tumas ia.”
Papa i laf. “Mi mi no olfala tumas ia.”
Allan i tingting smol taem. “Bae mi kasem eit yia i no longtaem,” hem i talem. “Mi save gat wan jenol long betdei blong mi?”
“!Yes, i oraet nomo!” Papa i talem.
“Afta, mi save raetem ol stori blong mi mekem se wan dei ol pikinini blong mi oli save ridim olgeta.”
“!Hemia i olsem wan gudfala famli kastom!” Papa i talem.
Ol pikja droing oli kam long Alessia Girasole