Yu No Stap Yuwan Tumas
Damián i wantem se evri famli blong hem oli save kam tugeta long jos.
Damián i lukluk gud long basket blong hem blong luk se hem i karem wanem we hem i nidim. ?Ol klos blong jos? Yes. ?Sus? Yes. ?Buk blong Momon? Yes. Hem i pulum sipa blong sarem basket, putum ova long solda blong hem mo wokbaot i go from doa.
“!Mama!” Damián i singaot. “!Bae mi stap go long Abuela (bubuwoman) mo Abuelo (bubuman)!”
Mama i stap foldem ol tawel. “Meksua se yu helpem ol bubu blong yu.” Hem i kam mo haggem Damián. “Mi save se yu laekem blong go long jos wetem tufala. Gat wan gudtaem tumoro.”
“Okei!”, Damián i talem. Be mi wantem yu blong save kam wetem mi, hem i tingting long maen blong hem.
Damián i wokbaot i go long bas stop. Evri Satedei, bae hem i go long bas mo krosem taon blong hem, Ekuado, blong go long haos blong bubuman mo bubuwoman. Hem i stap wan naet wetem tufala. Afta, hem i go long jos wetem tufala long nekis dei.
Long Sandei moning, Damián i werem klos blong go long jos. Hem i batenem set blong hem. Hem i werem sus blong hem. Afta hem i wokbaot i go long jos wetem bubuman mo bubuwoman blong hem.
Damián i laekem jos. Hem i laekem blong singsing long ol singsing, mo tekem sakramen. Hem i laekem blong luk ol fren blong hem tu. Be hem i wantem tumas blong ful famli blong hem i stap wetem hem.
Long aftenun ia, Damián, bubuman mo bubuwoman, oli wokbaot i go long haos blong Brata mo Sista Ruiz. Oli stap go blong gat famli haos naet tugeta. Abuela i karem wan swit kaekae.
Lesen i abaot Jisas. Damián i kalarem wan pikja blong Jisas taem hem i stap lisin long lesen. “Jisas i andastanem evri samting we yumi filim,” Brata Ruiz i talem. “Iven taem yumi harem nogud.”
Damián i luk long pikja blong hem we hem i droem Jisas. Pikja ia i mekem hem i hapi from se Jisas i save wanem hem i bin stap filim.
Afta long las prea, Abuela i talem. “Mi karem swit kek. ?Huia i wantem sam?
“!Mi!” Damián i talem. Swit kaekae ia we i gat plante krim, i fevret blong Damián. Mo Abuela i mekem nambawan swit kek.
Afta long haos naet, Abuela i wokbaot wetem Damián i go long bas stop mekem se hem i save gohom. Damián i lukluk daon long graon.
“Wan samting i rong?” Abuela i askem.
Damián i toktok sloslo. “Mi wantem tumas se ful famli blong mi i bin kam wetem yumi long jos.”
“Mi tu,” Abuela i talem. Hem i haggem Damián. “Be famli blong yu i lavem yu tumas. !Mo Abuelo tu, mo mi, mo plante narafala man!”
Bas i stop. Damián i sidaon long saed blong windo mo tata long Abuela taem we bas i stap ron i go.
Damián tingting long wanem we Abuela i bin talem. Hem i stap tingting abaot Mama, mo brata, mo sista blong hem. Hem i save se oli lavem hem tumas. Afta, hem i stap tingting abaot Praemeri tija blong hem. Mo Ruiz famli. Mo Abuela mo Abuelo. Olgeta evriwan tu oli lavem hem.
Aot long evriwan ia, , Damián i save se Papa long Heven mo Jisas, Tufala i lavem hem. Mo hemia i mekem se hem i nomo filim se hem i stap hemwan
Ol pikja droing oli kam long Julissa Mora