Tē toro nei ’o Carolina i te rima
Nāhea i nehenehe ai ia Carolina ’ia tauturu i tōna hoa ?
’Ua tāmata ’o Carolina i te fa’aro’o i tōna ’orometua. ’Aita rā i nehenehe iāna ’ia fa’aea i te hi’o i tōna hoa o Ramón. ’Aita tōna e rouru a’e !
’Aita i maoro a’enei te ha’amatara’a tōna rouru i te topa. I teienei, ’ua pahure roa tōna upo’o.
’Ua fa’aro’o ’o Carolina i te hō’ē māniania i muri iāna. ’O Cesar ’e ’o Luis tē ’ā’ata ra. ’Ua ti’aturi ’oia ē ’aita rāua e ’ā’ata ra nō Ramón.
I te po’ipo’i tā’āto’a ’ua ha’afefe noa ’o Ramón i tōna tapono. ’Aita ’oia i ’āfa’i i tōna rima i ni’a. E huru ’oto tōna. ’Ua hina’aro ’o Carolina e tauturu iāna ’ia maita’i mai.
I te pae hope’a ’ua tae i te taime nō te ha’uti i rāpae. ’O Ramón te ta’ata mātāmua i rāpae i te piha ha’api’ira’a. I te taera’a Carolina i rāpae, ’aita ’oia i ’ite iāna i te hō’ē vāhi ! ’Aita ’oia e tu’e ra i te pōpō. ’Aita ’oia e pa’uma ra i ni’a i te mau ’auri. ’E ’aita ’oia e ha’uti ra i te ha’uti ou’au’a ’e te ’orometua.
E rā ’oia ! Tē ti’a ra Ramón i te poro o te ’āua. ’E tei reira ato’a ’o Cesar ’e ’o Luis. ’Ua ha’afātata atu ’o Carolina.
« ’A hi’o na i te rahi ’o tōna upo’o ! » tē pi’i ra Cesar.
’Ua ’ata ’o Luis. « E hahu ato’a vau i tō’u upo’o ’āhiri mai terā ato’a te hā’iri’iri o tō’u rouru ».
’Ua pipi’i roa te rima o Ramón. Mai te huru ra ē tē haere ra ’oia e ta’i.
’Ua horo atu o Carolina ia Ramón ra. « Hina’aro ānei ’oe e ha’uti nā muri iā’u ? » tāna ïa uira’a. ’Ua fa’atoro atu ’oia i tōna nā rima, ’e ’ua haere ’ē atura rāua. ’Ua haere noa rāua ē fātata roa atu i te ’orometua. ’Aita hō’ē ta’ata e ha’ape’ape’a mai ia rāua i reira.
« E hina’aro ānei ’oe e ha’uti i te ha’uti ou’au’a ? » Te uira’a ïa a Carolina.
’Ua tā’iri’iri ’o Ramón i tōna upo’o. ’Ua pāpa’i ’oia i te mau rēni i ni’a i te repo.
« E aha tō ’oe huru ? » tāna ïa uira’a.
« E mea maita’i au i teienei ». ’Ua ’ata’ata ’o Ramón. « Māuruuru nō tō ’oe tauturura’a mai iā’u ».
’Ua ’ata ’o Carolina. ’Ua ’oa’oa ’oia ’ua nava’i tōna itoito nō te tauturu i tōna hoa !
Fa’ahōho’ara’a nā Hollie Hibbert