’Aita atu ra te mana’o mo’emo’e rahi
’Ua hina’aro roa Damián ’ia haere ’āmui mai tōna ’utuāfare i te purera’a.
’Ua hi’o ’oia i roto i tāna pūtē tei roto iho ā te mau mea e hina’arohia. Te ’ahu purera’a ? Tei roto. Te tīa’a ? Tei roto. Te Buka a Moromona ? Tei roto. ’Ua huti i te tāmaura’a o te pūtē ’e tei ni’a i te tāpono, ’e tē haere ra i te ’ūputa.
« Māmā ! » ’ua pi’i Damián. « Tē haere nei au iō Abuela ’e Abuelo [Māmā rū’au ’e Pāpā rū’au] ! »
Tē tūfetu ra Māmā i te mau tauera. « E tauturu ia Pāpā rū’au mā. » Fa’aea a’era ’oia i tāna ’ohipa nō te tauahi ia Damián. « ’Ua ’ite au e mea au nā ’oe ’ia haere i te purera’a ’e ’o rāua. « ’A ’oa’oa maita’i ananahi. »
« Nā reira ! », ’ua parau Damián. E mea hau atu rā ’āhani e haere mai ’oe nā muri iā’u, ’ua mana’o ’oia.
’Ua haere Damián i te tāpe’ara’a pere’o’o mata’eina’a. I te mau mahana mā’a ato’a, e haere ’oia nā ni’a i te pere’o’o mata’eina’a nā roto i tōna ’oire i te fenua Ētuatōria nō te haere i te fare o Abuela ’e Abuelo. E ta’oto ’oia i reira i terā pō. ’E ’ia po’ipo’i a’e e haere ’oia i te purera’a nā muri ia rāua.
I te po’ipo’i sābati, e ’ō’omo ’o Damián i tōna ’ahu purera’a. E tāmau i te mau pitopito. E ’ō’omo i tōna tīa’a. ’Ei reira e haere atu ai i te purera’a nā raro, nā muri ia Abuela ’e Abuelo.
E mea au nā Damián te purera’a. E mea au nāna ’ia hīmene i te mau hīmene ’e ’ia rave i te ’ōro’a mo’a. E mea au ato’a nāna ’ia fārerei i tōna mau hoa. Tē hina’aro nei rā ’oia i tōna ’utuāfare tā’āto’a ’ia haere mai nā muri iāna.
I taua avatea ra, ’ua haere ’o Damián ’e Abuela ’e Abuelo i te fare o te taea’e ’e te tuahine Ruiz. E fa’atupu rātou i te purera’a pō ’utuāfare. E ūhāmani (flan) tā Abuela i hāmani ’ei mā’a ri’i monamona.
Nō ni’a tā rātou ha’api’ira’a ia Iesu. ’Ua fa’a’ū Damián i te hō’ē hōho’a nō Iesu ’a fa’aro’o ai i te ha’api’ira’a. « ’Ua ta’a ia Iesu tō tātou mau mana’o ato’a », te parau ïa a te taea’e Ruiz. « Tō tātou ato’a ’oto. »
’Ua hi’o Damián i tāna hōho’a nō Iesu. E mana’o ’oa’oa tei tae mai ē, ’ua ’ite Iesu i tōna mana’o.
I muri a’e i te pure hope’a, ’o te reo ïa o Abuela : « E ūhāmani tā’u i ’āfa’i mai. ’O vai te hina’aro ? »
« ’O vau ? » ’Ua parau Damián. ’O te mā’a ri’i monamona ïa tā Damián e au roa a’e ! ’E nā Abuela te ūhāmani nūmera hō’ē.
I muri a’e i te purera’a pō ’utuāfare, ’ua ’āpe’e Abuela ia Damián i te tāpe’ara’a pere’o’o mata’eina’a nō te ho’i i tōna fare. E mea hi’o noa Damián i raro.
« E aha tō ’oe ? » Te uira’a ïa a Abuela.
Tu’atu’a te mata o Damián. « ’Ua hina’aro vau ’ia haere mai tō’u ’utuāfare tā’āto’a i te purera’a nā muri ia tātou. »
« ’O vau ato’a ho’i », ’ua parau Abuela. I reira ’ua tauahi ’oia ia Damián. « ’Ua here roa rā tō ’oe ’utuāfare ia ’oe. ’E nā reira ato’a ia māua Abuelo, ’e tē vai atu ra ! »
’Ua tae mai te pere’o’o mata’eina’a. ’Ua pārahi Damián i te ha’amāramarama ’e ’ua nānā ia Abuela ’a tere noa ai te pere’o’o mata’eina’a.
’Ua feruri Damián i te mea tā Abuela i parau. ’Ua feruri ’oia ia Māmā ’e tōna mau taea’e ’e mau tuahine. ’Ua ’ite iho ā ’oia ’ua here roa rātou iāna. I muri iho, ’ua feruri ’oia i tōna ’orometua Paraimere. ’E i te ’utuāfare Ruiz. ’E ia Abuela ’e ia Abuelo. ’Ua here rātou pā’āto’a iāna.
Hau roa atu, ’ua ’ite Damián ’ua here te Metua i te ao ra ’e Iesu iāna. ’E ’aita fa’ahou atu ra te mana’o mo’emo’e rahi
Fa’ahōho’ara’a nā Julissa Mora