Pionie i te mau fenua ato’a
’Ua ’itehia mai ia Dinis te hō’ē pāhonora’a
’Ua ’avīvī te ro’i ’a huri ai o Dinis. ’Ua hurihuri noa ’oia i te pō tā’āto’a. ’Aita rā i ti’a iāna ’ia ta’oto !
’E mai te mea ē ’ua hape te mau misiōnare ? ’Ua mana’o ’o Dinis. ’E mai te mea ē e ’ere teie i te ’ēkālesia mau ? ’E mai te mea ē tei ni’a vau i te ’ē’a hape ? ’Ua ha’ape’ape’a noa teie mau uira’a iāna.
’Ua tomo mai te ’utuāfare ’o Dinis i roto i te ’Ēkālesia e piti matahiti nā mua atu, i te 10ra’a o tōna matahiti. I te taime mātāmua ’a ha’api’i ai te mau misiōnare ia rātou, ’ua ’ite ’o Dinis i reira iho ē e parau mau te mau mea tā rātou e ha’api’i ra. ’O Dinis ’e tōna ’utuāfare te tahi o te mau ta’ata mātāmua tei tomo mai i roto i te ’Ēkālesia i Pōtītī. E pionie ’o Dinis !
’Aita rā i maoro a’enei, ’ua ha’amata ’oia i te ha’ape’ape’a. E mai te mea e ’ere te bāpetizora’a i te mā’itira’a ti’a ?
’Aita ’o Dinis i parau i te hō’ē ta’ata ē, tē ha’ape’ape’a nei ’oia. ’Aita tōna mau taea’e ’aore rā tōna tuahine. ’Eiaha ato’a tōna nā metua. I teie rā pō, ’o terā ana’e te mea tāna e nehenehe e feruri.
’Ua autā ’o Dinis. ’Ua hi’o ’oia i raro nā ni’a i te hiti o te ro’i. Tē ta’oto maita’i ra tōna mau taea’e i ni’a i te ro’i raro. ’O Dinis ana’e.
’Ua ’ite ’oia e ti’a iāna ’ia ani i te Atua ē, e parau mau ānei te ’Ēkālesia. ’Ua tūturi ’oia i rōpū i tōna ro’i. ’Ua taupe ihora ’oia i tōna upo’o ’e ’ua ha’amata i te pure.
« E te Atua ē », ’ua parau mārū noa ’o Dinis. « ’A fa’a’ite mai na iā’u ē, ’ua ’ite mau ānei ’o Iosepha Semita ia ’oe ’e ia Iesu ».
’Ua pure nā ’o Dinis e rave rahi taime nā mua atu. I teie rā taime e mea ta’a ’ē ïa. ’Ua hina’aro mau Dinis ’ia ’ite. ’Ua pure ’oia ma te ’ū’ana atu ā nō te fāri’i i te tauturu.
« ’Aita vau e hina’aro ’ia hape au », ’ua muhumuhu ’oia. « ’Ua hina’aro noa vau ’ia ’ite i te mea ti’a ».
I muri iho ’ua fāri’i a’era ’o Dinis i te hō’ē mea. E mana’o pūai ’e te māhanahana. ’Ua tupu te reira i te rahi i roto i te tōna tino tā’āto’a. Mai te huru ra ē e pa’a’ina ’oia i te ’oa’oa !
’Ua ’ite ’o Dinis ē, taua mana’o ra ’o te Vārua Maita’i ïa. ’Ua pāhono te Atua i tāna pure ! ’Ua tano te mau misiōnare. E peropheta mau ’o Iosepha Semita. ’E e ’ere te bāpetizora’a i te hō’ē noa mā’itira’a maita’i. ’O te mā’itira’a maita’i roa a’e ïa.
’Ua tārava a’era ’o Dinis i ni’a i tōna tua ’e ’ua hi’o noa i te aroaro. ’Ua mo’e ’ē tōna mau pe’ape’a. ’Ua huti mai ra ’oia i tōna ’ahu ta’oto ’āti a’e iāna. Hou ’oia ’a ’ite ai i te reira, tē ta’oto ra ’oia.
’A pa’ari noa ai ’o Dinis, ’ua ha’amana’o noa ’oia i te pō ’a pure ai ’oia i roto i tōna ro’i. ’Ua ’ite ’oia ē tei ni’a ’oia i te ’ē’a ti’a ’ei melo nō te ’Ēkālesia a Iesu Mesia. ’E ’ua ’ite ’oia ē e fa’aro’o te Metua i te ao ra i tāna mau pure i te mau taime ato’a.
E fenua ’o Potiti nō Europa tō’o’a o te rā.
E hiero tō Pōtītī. ’Ua ha’amo’ahia te reira i te matahiti 2019.
Tei te fenua Pōtītī te fare vaira’a buka tahito roa a’e i te ao nei.
’Ua bāpetizohia ’o Dinis i roto i te hō’ē vai ’aura’a i te fare misiōni.
’Ua tāvini ’oia i te hō’ē misiōni i te mau motu i rāpae i te pae fenua Paniōra, Pōtītī ’e ’Āfirita.
’Ua tāvini ato’a ’o Dinis ’e tōna nau taea’e ’e tuahine i te hō’ē misiōni i te hō’ē ā taime !
Fa’ahōho’ara’a nā Sammie Francis