Te mau hīmene ’e te mau hu’a pu’a
’Ua paho te ’ata a Alice ’’a feruri ai ’oia i te peresideni Kimball i te hīmenera’a ’e te hō’ē pua’atoro.
’Ua tu’u Alice hō’ē tāipu mataroni i roto i te ’āu’a a tōna taea’e. ’Ua here ’oia i tōna mau teina taea’e ’e tuahine—rātou pā’āto’a e pae ! E ’ohipa maita’i roa ’ia tauturu ia rātou. E mea fifi rā i te tahi taime ’ia riro ’ei mea pa’ari a’e. Mai te taime ’a tae mai ai te ’aiū ’āpī i te fare, ’ua tītauhia iāna ’ia tauturu rahi atu ā. E rave rahi ’ohipa e tupu ra i tōna fare !
« E aha tā ’outou i ha’api’i mai i te fare purera’a i teie mahana ? » ’Ua ui pāpā.
« Iesu ! » ’Ua parau te teina tuahine ’o Alice, ’o Sarah. ’Ua parai a’era ’oia i te ’āpara tāvirihia nā ni’a i tāna merēti.
’Ua ’ata ’o Alice. E mea nehenehe roa ’o Sarah. ’E te reporepo ato’a rā.
« ’Ua ha’api’i mai au nō ni’a i te peresideni Kimball… » ’ua ha’amata iho ra Alice i te parau. ’Ua pi’i mai ra rā ’o māmā nā roto mai i te tahi atu piha. ’Ua hina’aro ’oia i te tauturu a pāpā nō te ’aiū.
« ’Eiaha e ’ino’ino », ’ua parau o pāpā. « E ho’i mai ā vau ».
’A tauturu ai pāpā ia māmā, ’ua tauturu Alice i te tā’āto’ara’a. ’Ua ha’amani’i Eric i tāna hāpaina ū. ’Ua tāmā Alice i te reira. ’Ua ha’amata o Sarah i te ta’i. ’Ua tauahi Alice iāna. ’Ua hina’aro fa’ahou Clara i te mataroni. ’Ua hōro’a Alice i te tahi nāna.
’Oia ato’a i te taime ’a ho’i fa’ahou mai ai o pāpā, e mea māniania ’e te nahonaho ’ore noa ā te piha tūtu. ’Ua hina’aro Alice ’ia ’ōhie a’e i te fāri’i i te hau.
Teie nei ra, ’ua oti te tāmā’ara’a. ’Ua tauturu Alice i tōna mau teina taea’e ’e tuahine ’ia tu’u i tā rātou ’āu’a i roto i te vāhi horoira’a. ’Ua nava’i te pa’ari o Alice nō te ’orera’a e tūparari i te mau tauiha’a. Nō reira nāna te ’ohipa horoira’a i te ’āu’a. ’Ua fa’a’ī ’oia i te vāhi horoira’a ’āu’a i te pape pu’a.
Tē hina’aro nei au ’eiaha roa atu e rave i te ’ohipa, ’ua mana’o o Alice. ’Ua ha’amana’o a’era ’oia i te mea tāna i ha’api’i mai i te Paraimere nō ni’a i te peresideni Spencer W. Kimball. I tōna ’āpīra’a, ’ua tītau-ato’a-hia iāna ’ia rave i te ’ohipa. E hīmene ’oia i te mau hīmene purera’a ’a fa’atē ai ’oia i te ū o te pua’atoro !
’Ua feruri Alice i te peresideni Kimball e hīmene ’āpiti ra ’e te hō’ē pua’atoro. ’Ua paho a’era tāna ’ata.
I muri iho, ’ua tupu mai te hō’ē mana’o iāna. E nehenehe ’oia e riro mai te peropheta ! ’Ua rave ’oia i te buka hīmene ’e ’ua hōhora i te hīmene mātāmua.
E ti’a iāna ’ia vaiiho matara noa te reira. ’Ua tu’u atu Alice i te buka i ni’a i te hiti ha’amāramarama. ’Ua fa’ahe’e ’oia i te hō’ē hiti o te buka i muri mai i te hō’ē rā’au tanu i roto i te fa’ari’i. I muri iho, ’ua fa’ahe’e ’oia i te tahi atu hiti i muri mai i te hō’ē ’āu’a teiaha. I teienei e nehenehe tāna e ’ite i te reira ’a rave ai ’oia i te ’ohipa.
’A horohoroi noa ai Alice i te mau ’āu’a, te mau hāpaina ’e te mau taipu, ’ua hīmene noa ’oia i te hīmene. ’Ua au roa ’oia i te hu’a pu’a māhanahana i ni’a i tōna nā rima. ’E ’ua fa’a’oa’oa te hīmene i tōna māfatu.
I te mahana i muri iho, ’ua hīmene fa’ahou o Alice. ’E i te mahana i muri iho fa’ahou mai. ’Ua tāmata ’oia i te ha’amana’o i te mau parau o te hīmene tāta’itahi. I muri iho, ’ua rave i tō muri mai. ’Ua ha’api’i ato’a mai Alice i te mau hīmene ’āpī ! ’Ua ha’api’i mai ’oia i te ha’uti i te piāna i te roara’a o te tahi tau matahiti. ’Ia ’ore ana’e ’oia e ’ite i te hō’ē hīmene, e ha’api’i mai ’oia i te mau nota i ni’a i te piāna.
’Aita i maoro, ’aita fa’ahou ’o Alice i ha’ape’ape’a nō te horoi i te ’āu’a. I te tahi taime ’ua au roa ’oia i te reira ! E mea au roa ’ia hīmene ’e ’ia feruri ia Iesu. Te ha’api’ira’a mai i te hō’ē hīmene ’āpī, ’ua riro mai te ha’amātaura’a i te hō’ē hoa ’āpī. Noa atu te huru māniania o te orara’a ’ati a’e iāna, ’ua tauturu te mau hīmene iāna ’ia fāri’i i te hau.
Fa’ahōho’ara’a nā Erin Taylor