Fren i go long Fren
Sakem Sin From Eleveta
Taem mi gat 11 yia , famli blong mi i stap laef long wan 12 stori haos bilding long Hong Kong. Evri dei afta long skul, mi ron i go insaed long bilding mo pas long eleveta i go antap long apatmen blong mifala.
Wan dei, mi go insaed long eleveta mo prestem evri baten mo oli laet. Naoia bae eleveta bae i stop long evri apatmen i go antap. Doa i stat blong klos, be kwiktaem wan han i kam tru blong openem bak doa blong eleveta. Hem i wan long ol neba blong mi long ol apatmen antap . Hem i no talem eni samting abaot ol baten ia, be mi stap fraet smosmol. !Mi filim olsem se i longtaem nao blong mi save kasem hom!
Yes, eleveta i stop long nekis flo, i wet mo afta i gohed bakegen. Taem we doa i open long flo blong apatmen blong mi, kwiktaem mi ron i go aot. !Mi kasem haos mo stap swet from mi ron spid tumas!
I no longtaem taem mi kasem haos, fon i ring. Hem i neba ia long eleveta. Mi fraet tumas mo stap wet long mama blong mi blong i ofem fon.
Afta we hem i ofem fon, mama blong mi i askem, “?Yu yu bin prestem evri baten long eleveta?”
Mi no save giaman long mama blong mi. “Yes,” mi talem.
Mama blong mi i smael. “Okei, bae yumitu go antap mo toktok long neba blong yumi.”
Mitufala i go antap tugeta long apatmen blong neba. Mi ringim bel long doa mo neba i kam blong openem doa. Hed blong mi hang daon taem mi talem sore from se mi prestem evri baten blong eleveta. Mi promes bae mi neva mekem bakegen.
Neba blong mifala i kaen. Hem i talem se “Sapos nomo se bae yu nomo mekem bakegen, mi tingting se i stret ia nao.”
Afta we mi talem sore long hem, mi filim gud. Mo mi neva prestem evri baten blong eleveta bakegen.
Eksperiens ia i helpem mi blong lanem abaot fasin blong sakem sin. Mi save se mi bin mekem wan samting i rong. Mi filim sore mo askem fogivnes. Mo mi neva mekem bakegen. Afta, !mi filim hapi! Fasin blong sakem sin i save karem hapines i kam.
Ol pikja droing oli kam long Alyssa Tallent