Stap Faenem Pis
“Plis helpem mi blong no filim se mi stap miwan.”
Molly i traem blong no krae taem hem i talem tata long sista blong hem, Macy. “Mi lavem yu!” Molly i talem. Hem i mekem wan bigfala hag long Macy.
“Bae mi luk yu afta sam manis i pas,” Macy i talem. Macy i stap lego hom blong go long kolej. Wan long ol brata blong Molly i go finis long kolej. Narafala brata blong hem i stap long wan misin. !Molly bae i misim tumas olgeta evriwan!
Mama i skwisim han blong Molly. Oli wajem Macy i draev i go. “Bae yumi misim hem,” Mama i talem. Wota blong ae blong hem i fulap.
Molly i wokbaot i gobak insaed long haos. Hem i go long emti bedrum blong Macy mo sarem doa. Afta, hem i sidaon long bed blong Macy mo stat blong krae.
Wan man i noknok long doa. Mama mo papa tufala i kam insaed. Tufala haggem Molly. Olgeta evriwan i sidaon long bed blong Macy, kasem taem we ol wota long ae blong Molly i drae.
“Mi save se yu harem nogud from Macy i go finis,” papa i talem. “?Bae yumi save mekem wan famli prea? Yumi save askem Papa long Heven blong helpem yumi filim moa gud. ?Plis, yu save prea Molly?
“Okei.” Molly i benem hed blong hem i go daon. “Papa long Heven, mifala i talem tangkyu from evriwan long famli blong mifala—from Will, Parker, Macy, mi, mo Mama mo papa. Mifala i talem tangkyu long Yu se bae mifala i save stap olsem wan famli blong oltaem. Plis helpem mifala blong filim kamfot. Mo helpem mi blong no filim se mi stap miwan.”
Molly i misim blong stap toktok wetem Macy long taem blong silip. Be hem i save se Papa long Heven i harem ol prea blong hem. Hem i save se bae Papa long Heven bae i save helpem hem blong filim moa gud.
!Long nekis moning, haos blong Molly i kwaet we i kwaet! Hem i misim blong stap laflaf wetem Macy taem tufala i stap rere blong go long skul. Hem i misim blong stap kakae brekfas tugeta mo stap toktok. Samtaem Macy bae i tokbaot wanem we hem i stap lanem long seminari. Oltaem Molly i stap filim pis taem tufala i stap tokbaot gospel.
!Hemia nao! !Molly i gat wan tingting!
Molly i rere blong go long skul. Afta hem i faenem mama.
“Halo naesfala gel.” Mama i haggem hem. “?Yu yu rere blong go long skul?”
“?Yumi save ridim wan konfrens toktok tugeta bifo mi go?” Molly i askem. “Mi tingting se bae hemia i helpem mi filim moa gud.”
Mama i smael. !Hemia wan gudfala tingting!
Oli rid wan afta narawan long wan toktok blong jeneral konfrens we i tokbaot kamfot. Molly i laekem blong spendem taem wetem mama. Mi filim gud blong ridim ol toktok wetem hem.
Taem oli finis, Molly i smael. “Bae yumi mekem hemia bakegen!”
Hem i stap misim yet Macy, Will, mo Parker. Be hem i nomo filim tumas se hem i stap hemwan. !Hem i kasem ansa long ol prea blong hem! Hem i save spendem taem wetem mama mo papa blong hem. Mo ol toktok blong ol profet oli save helpem hem blong fanem pis.
Ol pikja droing oli kam long Liz Brizzi