Stap Help mo Tabu Spirit
Yu save filim Tabu Spirit iven bifo yu kasem baptaes.
Mateo mo papa blong hem, tufala i wokbaot tugeta i go long smol haos blong salem ol frut, we i blong famli blong olgeta. Dog blong Mateo, Zeus, i folem tufala.
“?Yu bin askem bisop abaot baptaes blong mi?” Mateo i askem. Hem i kasem eit yia finis, be hem i no bin kasem baptaes from wol sik ia.
“Hem i talem se bae yu no save kasem baptaes long manis ia,” Papa i talem. “Ating nekis manis.”
“Okei.” Mateo i mekem fes we i soem se i harem nogud. Help i wantem tumas blong kasem baptaes mo kasem presen ia we i Tabu Spirit. !Be i luk olsem se bae i neva hapen nomo!
Papa i openem doa blong smol haos blong ol frut blong salem. Mateo i help blong karemaot ol bokis blong aranis, laman, manggo mo ol banana. Afta, hem i help blong putum olgeta long ol self.
Mateo i gohed blong stap tingting long Tabu Spirit, taem oli stap wok. “?Yumi filim Tabu Spirit olsem wanem?” hem i askem.
“Tabu Spirit i kamfotem mi taem mi harem nogud,” Papa i talem. “Mo Hem i mekem mi filim gud taem mi helpem wan narafala man.”
!Mi no save wet blong kasem baptaes blong mi save filim Tabu Spirit tu!
“Iven bifo taem yu kasem baptaes mo konfemesen, papa i talem. “Yu save filim kamfot blong Hem naoia. Olsem taem yu prea o mekem wan samting we i kaen long wan narafala man. Mo afta we yu kasem konfemesen, yu save gat Tabu Spirit i stap wetem yu oltaem.
Mateo i tingting long hemia. ?Hem i bin filim Tabu Spirit bifo?
I no longtaem, oli karemaot evri samting long ol bokis. “?Yu yu rere blong helpem tufala Sosa?” Papa i askem.
Mateo i sakem hed blong hem blong talem yes. Mista mo Misis Sosa, tugeta i gat had taem blong stap wokbaot. So, Mateo i go long maket long bihaf blong tufala. Samtaem hem i helpem tufala blong mekem ol wok long haos tu.
Mateo mo Zeus oli wokbaot i go long haos blong tufala Sosa. Misis Sosa i sakem han blong talem gud moning taem hem i stap sidaon long vranda blong haos. “!Gud moning!”
“?Yu yu nidim blong karem ol kaekae long stoa tedei?” Mateo i askem.
“Yes. Mi nidim bred, poteto mo mit blong buluk.” Misis Sosa i karemaot sam koen mo kaontem. “Hemia bae i naf blong pem.”
Mateo i karem mane. Hem i luk wan plastik blong ol toti long saed blong doa. “Mi save karemaot hemia blong yu?” hem i askem.
“Yes. !Tangkyu!” Misis Sosa i talem.
Afta we hem i karemaot plastik blong toti, Mateo i karem kaekae i kam. Hem i tingting long evri samting we hem i mekem long moning ia. Hem i helpem papa long smol haos blong salem ol frut. Hem i helpem tufala Sosa blong go pem kaekae. Mo hem i bin gat wan gudfala filing. !Hem i stap filim Tabu Spirit, olsem we papa i bin talem!
Mateo i hop se bae hem i nomo wet longtaem tumas blong kasem baptaes. !Hem i wantem blong gat Tabu Spirit i stap wetem hem oltaem!
Ol pikja droing oli kam long Carolina Farías