Fani Trik long Baeskel
Ol fren blong hem oli talem se bae i fani. Be i no fil raet.
Sam i patel spid we spid long baeskel blong hem i go antap long hil. Hem i benem hem i go fored. Win i blo tru long hea blong hem. Fren blong hem, Liam i patel long baeskel narasaed long hem.
“Yu stap taet nao?” Liam i talem.
“!Nogat!” Sam i talem.
Fren blong tufala, Eric i stap finis long pak long top blong hil.
“Komm schon! !Hariap ia!” hem i singaot strong i go long tufala.
Sam mo Liam, tufala i kasem top blong hil. Ol boe oli putum ol baeskel blong olgeta long wan ples mo oli sidaon andanit long wan tri.
Liam i pikimap wan ston mo sakem. “Mi les blong stap mekem semmak samting oltaem.” I No gat plante ples blong go long hem insaed long smol vilej blong olgeta, long Switselan.
“Mi tu,” Eric i talem. Hem i skrasem graon wetem wan stik.
“Yumi save gohed blong ron long baeskel,” Sam i talem.
Liam i mekem fes blong hem i nogud. “Hemia i wanem we yumi stap mekem oltaem.”
“!Bae yumi mekem wan fani samting!” Eric i talem. Kwiktaem hem i stanap mo wokabaot i go long ples we plante baeskel oli pak i stap long hem. Sam mo Liam tufala i folem hem.
Bel blong Sam i no filim gud. Samtaem wanem samting we Eric mo Liam i stap tingting long hem se i fani be long hem bae i no fani. Eric mo Liam tufala i laekem blong stap jikim ol narafala pikinini mo talem ol nogud toktok long klasrum. Be ating long taem naoia bae i defren.
Mo tu, i no gat plante boe long klas blong Sam. Sapos hem i no mekem fren wetem Eric mo Liam, ?huia nao bae hem i mekem fren wetem olgeta?
“Bae yumi slakem evri wil blong ol baeskel,” Eric i wispa. “Yumi save haedem olgeta long saed blong tri.” Hem i nildaon long saed blong wan red baeskel we i saen gud, mo tantanem lid blong ples we oli stap pamem wil long hem, blong letem ea i kamaot, long wan wil blong baeskel.
Liam i laf. “!Yes! Hemia bae i fani tumas.”
Sam i pulum win. No. Taem ia i no bin defren. “Mi no save,” hem i talem. “Ating yumi mas aot nomo long ples ia.”
Eric i pusum han blong Sam “Yu kam!” hem i talem. “No gat wan man i stap luk yumi.”
“Oli ol smosmol pat nomo,” Liam i talem. “No gat wan bae i luksave se oli kamkamaot.”
Sam i traem blong pusumbak nogud filing ia long bel blong hem. Blong stap karemaot ol lid blong pin long wil, bae i no save spolem gud ol baeskel. Hem i pusum tufala solda blong hem i go antap mo saksakem hed blong agri.
Kwiktaem, trifala boe i karemaot evri lid long pin blong wil blong baeskel mo oli ron i gobak long tri. Oli haedem evri lid ia andanit long wan bigfala ston mo oli sidaon mo stap lukluk ol baeskel. Liam mo Eric tufala stap laflaf smosmol.
I no longtaem, wan man i wokbaot i go mo karemaot lok long baeskel blong hem, mo ron i go.
“?Yu luk?” Hem i no iven luksave nomo,” Liam i talem.
Be mi mi luksave, Sam i stap tingting.
Long ful dei ia, Sam i no save stop blong stap tingbaot ol lid blong pin blong baeskel. Hem i stap tingbak se sapos hem i save givimbak ol lid ia, be hem i no save olsem wanem blong faenem ol man blong ol baeskel ia. Hem i nildaon mo talemaot evri samting long Papa long Heven.
“Mi filim nogud,” Sam i talem. “Mi stap tingtingbak se sapos mi no bin mekem olsem. Papa long Heven, plis fogivim mi.”
Long nekis dei, Sam mo tufala fren blong hem oli ron long baeskel i gobak bakegen long pak.
Wan moa taem, Eric i talem se, “!Bae yumi karemaot ol lid blong pin long wil!”
Wan moa taem, Liam i agri.
Sam i tingbaot prea blong hem. Mo naoia, hem i filim smol se bae hem i save tok stret.
“Mi no tingting se bae yumi mas mekem,” hem i talem.
“?From wanem no?” Liam i askem, mo mekem wan nogud fes. “I no gat wan i luksave yestedei.”
“Bae mi no wantem wan man blong i stap spolem baeskel blong mi,” Sam i talem. Bifo wan long tufala boe i ansa, hem i jiam i go antap long baeskel blong hem. “!Yumi resis i go long stoa blong bred!” hem singaot strong i go long tufala. Afta hem i stat blong patel spid we spid long baeskel blong hem.
Eric mo Liam tufala pulum baeskel blong tufala tu.
“!I no fea ia! Yu stat fastaem,” Liam i singaot i go long hem.
Sam i laf smosmol taem tufala fren blong hem i stap resis i kam biaen long hem. Hem i wispa i go long Papa long Heven blong talem tangkyu. Hem i filim moa gud.
Pikja droing i kam long Shane Clester