Man we i raetem i Yu
Ol Gol blong Kasem Baptaes
Long Novemba 2019, mi bin lisin long toktok blong Elda Gong long fes tu fes blong Ol Pikinini mo Ol Yut program, wetem famli blong mi. Afta long brodkas ia, bisop i givim ol buklet long mifala blong helpem mifala blong wok from ol gol blong mifala,
Fasfala gol blong mi i blong ridim flatem Buk blong Momon bifo mi kasem 8 yia betdei blong mi, blong mi rere blong kasem baptaes. Mi bin statem finis blong stap ridim be mi no soem tumas intres. Be long dei ia mi mekem wan plan wetem papa blong mi. Mitufala i fanemaot hamas japta mi mas ridim evri dei blong save finisim Buk blong Momon bifo mi kasem baptaes. Mi stat blong ridim evri dei mo makem taem mi ridim flatem wan seksen.
Taem mi stap rid, mi wantem moa blong mekem ol gud samting. So, mi joenem wol fast we Presiden Nelson i anaonsem blong help blong kontrolem KOVID-19. Mi glad se mi save mekem wan livim kaekae fulwan. Papa mo mama blong mi i leftemap tingting blong mi blong prea mo livim kaekae blong kasem wan testemoni blong miwan abaot Buk blong Momon mo long saed blong baptaes.
Long fas Sandei blong Mei, mi bin prea mo livim kaekae. I no longtaem nomo, mi ridim flatem ful Buk blong Momon. Mi glad tumas blong kasem baptaes—long betdei blong mi. !Mi filim se mi rere blong mekem kavenan wetem God! Mi save se Buk blong Momon i tru. Mi laekem blong stap ridim Buk blong Momon mo mi hapi se mi kasem gol ia wetem help blong famli blong mi.
Pikja droing i kam long Rosalie Ledezma