Ol Paeonia Long Evri Kantri
Piano blong Ludovic
Ludovic i glad blong givim seves long Papa long Heven.
Ludovic i pikimap sam jea we oli foldem mo karem olgeta i go krosem rod. Hem i Sandei mo jos bae i stat i no longtaem. Haos we oli stap jos long hem long Toko i no gat inaf jea. Mekem se oltaem Ludovic bae i karem ol jea long haos blong bubuman blong hem.
“?From wanem bae yu lego wan naesfala jos blong go long wan smol roten selta?” wan i singaot biaen long hem. “!Jos blong yu i no iven gat ol stul blong sidaon long hem!” wan narafala man i talem mo i stap laf.
Ludovic i mekem olsem se hem i no harem. Mi mas gohed blong mekem wanem we i raet, hem i tingting.
Ludovic i lanem faswan abaot Jos taem hem i gat 10 yia. Naoia hem i gat 12 yia. Hem mo famli blong hem oli bin baptaes i no longtaem i pas. Hem i kasem prishud mo i help blong pasem sakramen. Hem i iven sevem sam mane blong lanj blong hem blong pem bred blong sakramen evri wik. Ludovic i glad blong givim seves long Papa long Heven.
Taem we i taem blong jos i stat, smol rum i fulap. Sam pipol oli bin sidaon long ol jea we Ludovic i bin karem i kam. Ol narafala pipol oli stanap.
Miting i stat wetem wan singsing. “Isrel, Isrel, God I Stap Singaot,” Ludovic i singsing. Hem i laekem blong singsing long jos.
Afta jos, Ludovic i saonem singsing taem hem i stap putumaot ol jea. Hem i saonem singsing taem hem i stap wokbaot i go long haos. Afta, !hem i gat wan aedia! Hem i karemaot pleiplei piano blong hem. Maet bae hem i save wokemaot hao blong plei singsing ia “!Isrel, Isrel, God I Stap Singaot”!
Ludovic i saonem ol not mo plei ol defdefren ki kasem we hem i mekem i stret. I no longtaem, hem i tijim hemwan blong plei singsing ia fulwan.
Afta, hem i tingbaot se famli blong hem oli bin gat sam hym blong Jos we oli rekodem. Hem i lisin long olgeta mo lanem blong plei ol narafala singsing tu. Ludovic i praktis mo praktis.
“?Yu save plei long jos taem mifala i singsing?” Papa blong Ludovic i askem wan dei.
Bel blong Ludovic i mekem ol filing blong fraet. “Mi fraet tumas,” hem i talem. “?Bae i olsem wanem sapos mi stap mesmestem?”
“Bae yu gohed blong go plei piano,” papa i talem. “Yu yu wan gudfala man blong plei piano bitim wanem we yu stap tingting long hem.”
Long nekis Sandei, Ludovic i no jes karem ol jea nomo. Hem i karem pleiplei piano blong hem tu. Taem we i taem blong fas singsing, wetem fraet, hem i putum ol fingga blong hem long ol ki. Afta, hem i stat blong plei. Evriwan i singsing folem. !Mo i saon gud tumas!
Ludovic i plei piano evri Sandei afta long taem ia. Samtaem hem i no mekem gud. Be hem i no givap. Taem we singsing i had tumas blong plei, oli singsing nomo olsem no gat piano mo Ludovic i lidim singsing.
Ludovic i smael. I nomata long hem sapos oli jos long haos blong wan narafala man. I nomata long hem taem ol pipol oli stap jikim hem. Wanem we i mata long hem i we, Ludovic i stap yusum talen blong hem blong givim seves long God.
Toko i wan smol kantri long wes Afrika.
Tedei i gat 21 wod mo branj long ples ia.
Ofisol lanwis blong Toko hem i Franis.
Wan misinari i bin tijim Ludovic blong ridim miusik mekem se hem i save plei piano moa gud.
Ludovic i gro bigwan naoia. Hem mo waef blong hem, Benedict, tugeta i laekem miusik.
Ludovic i gat wan ril piano blong hemwan long hom mo plei ogan long jos.
Ol pikja droing oli kam long Caroline Garcia