Te Reirei ae Boou, Te Rao ae Boou
E na kanga n reke raoraon Ada ngkai e kabi n taetae n Itiaina?
“I maaku,” e taku Ada. Ai bon tibwa moan ana bong n reirei i Taiwan. Ma e aki taetae n Itiaina n aroia ataein te reirei. E na kanga n reke raoraona? Antai ae na takakaro ma ngaia n tain te bureiki?
E korakora ana inga te Tina nakon Ada. “E raoiroi ngkana ko maaku.”
E matabubuaka Ada. “I aki ataia bwa a na kanga n reke raoraou ikai.”
E a manga inga riki Tinana nakoina. “Ngkana e nako nanom, tao ko kona n iangoa kunan te Moanrinan. E na ibuobuoki anne?”
E katoutoua atuuna Ada. Ngkanne e nakonako ma Tinana nakon ana kiraatiruum. E tataningaaki iroun ana tia reirei. “Ni hao!” e taku te tia reirei. E kataia ni moangare Ada. E aki ataia bwa tera nanon taian taeka akekei.
E kaboo Ada nakon Tinana. Ngkanne e reke ana taibora ao ea tekateka iai.
E taraia ataei ake tabeman. Tabeman a taetae ni kawai i bon imarenaia. Tabeman a tekateka n aki karongooa n aron Ada. E nako nanon Ada. Titebo ma ai aron tangin te manibeeru inanon birotona.
Ngkanne e a noora te ataeinaine ae tang Ada. E tangiria Ada bwa e na buokia. Ma e na kanga n ibuobuoki ngkana e kabi n taetae n Itiaina? Ai tera ngkana arona bwa e aki kan buokaki te ataeinaine arei?
Ma ngkanne Ada e karaoa te bwai are e tuangaki iroun tinana. E iangoa taekan kunan te Moanrinan ae mamaten naona: Itangitangiri n aron ae tangiri ngkami Iesu.” E ataia Ada ae tuangaki iroun te Tamnei ae Raoiroi bwa e na ibuobuoki.
E tekateka Ada irarikin te ataeinaine arei. E rabwata te ataeinaine ni baina. Ngkanne e bobooa nuukana n aron are e karaoia Tinana ngkana e maaku Ada. E a toki tangin te ataeinaine! E a manga koona Ada.
E koteia i bon irouna Ada. “Ada.”
E koteia te ataeinaine i bon irouna. “Mei,” e taku.
E moangare Ada. E tekateka irarikin Mei ni karokoa tokin te bong anne. E ngae ngke a aki taetae n taetae ae ti te arona, a bon unga ni kabane. A kaai ni kana aia katawanou. A kaai n takakaro n tain te uritieeti. Ao Mei e buoka Ada n reiakin taeka aika a boou n te taetae n Itiaina!
E aki kan tataninga Ada n tuanga Tinana taekan raoraona ae boou. E ataia bwa ngkana e iriira Iesu, a na bon akea te bwai teuana ae na kona ni maakua.
Kamatata n te tamnei iroun Shawna J. C. Tenney