Man te Moan Beretitentii
Te Ota ao te Rau n te Tembora
Anaaki taekana man “I Tangiria n Noora te Tembora,” Riaona, Meei 2021, 28–31.
Nooran te tembora ke tamneina teuana e kona n anganiko te nano ni kan roko inanona n te bong teuana. E na roko te bong are ngkana e kona n reke am beeba ni kariaia nakon te tembora ni karaoa te bwabetito inanon te tembora. Ngkana ko bwabetitoaki ibukin temanna are e a tia ni mate, ko buoka te Tia Kamaiu n Ana mwakuri ae tabu ni kakabwaia natin Tamara are i Karawa.
Ririki aika a nako, I nako ma natiu te aine nakon te tembora. Bon ngaia te kabane ni bwabetitoaki n te bong arei. Te tia mwakuri n te tembora e tuanga natiu te aine ngkana e kona n tiku ni maan ibukiia aomata ake a tauraoi araia n te bong anne. E taku eng.
I mataku ngke e ruo natiu te aine n te tabo ni bwabetito. E waaki te bwabetito. E waanako te ran rikaaki iaon ubuna ni katoa tai ngkana e betirake man te ran. E manga butiaki riki imwiina ao imwiina, “Ko kona ni karaoia riki?” Ni katoa tai, e kangai eng n te bwanaa ae nanonna raoi. E tiku ni karokoa te kabanea n aomata iaon te rinan n ara n te bong anne n tia ni bwabetito n aran Iesu Kristo.
I teimatoa n namakina te ota ao te rau ngkai ti ikotaki n riannanako man te tembora. Anne aron te mwakuri n te tembora ni tabekira rake ao ni bitiira.
Otan te Tembora
Katokai tamnei aikai ni mweengam ni kauringko bwa ko kona n rin n te tembora n te bong teuana.