O Uo i le Tolauapiga
I le taimi muamua, sa lagona e Edison lona le taliaina.
Sa kiki e Edison le palapala. O isi tamaiti sa talanoa ma faatutu fale’ie. Ae sa le masani o ia i se tasi.
Sa le toe o i le lotu le aiga o Edison i sina taimi ina ua latou siitia atu i Sepania. Ae na o mai tamaiti o le uarota ma valaaulia o ia e sau i le malaga tolauapi. Sa foliga manaia le tolauapiga, ae o lea ua le mautinoa e Edison na te manao e i ai iinei. Sa ia lagona lona le taliaina.
E toalua tama, o Diego ma Juan, na savavali atu ia Edison. “E te manao e nonofo faatasi i le ma fale’ie?” Sa fesili atu ai Diego.
Sa manava i fafo Edison ma ataata. “Ioe.”
“Manaia,” o le tala lea a Juan. “Ona tatou o ai lea tatou ’au’au.”
Na faatu e tama lo latou faleie ona tamomoe ai lea i le vaitafe. Sa malulu le vai, ae sa matua fiafia Edison na te tau le’i iloaina. Ina ua uma le ’aiga o le aoauli, sa o atu tama ma o latou taitai i se savaliga sopo. Sa latou toe foi mai ina ua amata ona goto le la, o lea sa latou fesoasoani ai e fai se afi o le tolauapiga.
“E faapei mai lou aiga?” Na fesili ai Juan.
Na faapa’ū e Edison se faaputuga alala i tafatafa o le afi. “E agamalie o’u matua. Ma o lo’u tuafafine o la’u uo mamae. Na matou siitia mai Ecuador.”
Sa tilotilo Diego ma Juan i le tasi ma le isi ma ni foliga ataata.
“Ma te o mai foi mai Ecuador!” Na fai mai ai Juan.
Na tatala e Diego lana ofu mafanafana e faaali lona mitiafu. Na i ai le faailoga o le au soka a Ecuador i luga!
“Oka!” O le tala lea a Edison. “O le a la le mea e pito i sili ona e misia e uiga ia Ecuador?”
Na talie Diego ma Juan. “O meaai!” na la taufaifeei atu ai.
Na talanoa pea tama e uiga i mea na latou misia e uiga ia Ecuador ma mea latou te fiafia i ai i le nonofo ai i Sepania. Na fiafia Edison i le faigofie ona talanoa atu ia Diego ma Juan.
Ona tu ai lea i luga o se tasi o taitai, o Brother Cisneros. “Ei, tatou uma! Matou te mananao e faaiu le po i se sauniga molimau.”
Sa taitasi ma tutulai tama ma taitai ma faasoa atu a latou molimau. O a latou upu na lagona ai i le loto o Edison e pei ua ’aui i se palanikeke mafanafana.
Na tu i luga Diego. “Ou te iloa e moni le Ekalesia. Ou te iloa o le Atua o lo’u Tama ma o Iesu Keriso o lo’u Faaola.”
Na faatupulaia le malosi o le lagona mafanafana. Ou te fia iloa foi lena mea, o le manatu lea a Edison.
Ina ua taunuu Edison i le fale mai le malaga, sa tumau pea upu a Diego i lona mafaufau. Sa ia moomoo maimau pe ana mafai ona alu i le lotu ma aoao e uiga ia Iesu faatasi ma Diego ma Juan.
I lena po i le taumafataga o le afiafi, sa fesili ai Papa, “Na faapefea mai le malaga tolauapi?”
“Sa manaia tele!” O le tala lea a Edison. “Na matou auau ma savavali sopo ma fai se afi. Sa maua foi ni a’u uo se toalua e o mai foi mai Ecuador!”
“Lelei tele! E tatau ona tatou valaaulia i la’ua e omai i le tatou fale,” o le tala lea a Mama.
Sa filemu Edison. “Mata e mafai ona tatou toe o i le lotu?”
E le’i fai mai se tala a Mama ma Papa mo sina taimi. Ona kilia lea e Mama o lona faa’i. “A e manao e te alu, e leai se mea e leaga ai,” o lana tala lea. “Ae o ma’ua ma Papa o le a le o.”
Sa faapa’ū ifo Edison i lona nofoa. Sa le’i fia alu na’o ia i le lotu. Masalo e tatau ona ia nofo i le fale ma lona aiga.
Ona manatua ai lea e Edison o le lagona mafanafana mai le sauniga molimau. Tusa lava pe le fia o lona aiga i le lotu, sa fia alu Edison.
E le gata i lea, o le a le tuua na o ia. Sa ia ataata a o ai lana meaai. Ona ia pikiina lea o le telefoni. Sa ia iloaina ni uo e mafai ona latou o faatasi i le lotu!
Ata na tusia e Hollie Hibbert