Mate Po o Ai e Alofa ia te Oe, Mrs Banks!
Na amata i se fugalaau e tasi …
Sa fiafia Roxy e matamata atu i fale uma o lona pitonuu a o savali atu i le fale mai le aoga. O se tasi fale sa i ai se taifau e ou ma oso i luga ma lalo i le faamalama. O le isi fale sa i ai manu felelei i luga o laau.
Ona sosoo ai lea ma le fale o Mrs. Banks. Sa avea Mrs. Banks ma ana faiaoga i le vasega tolu, ma sa sili ona fiafia i ai Roxy. E talotalo atu lava Roxy ia Mrs. Banks pe a ia vaaia o ia o nofo i luga o le nofoa i luma o lona faapaologa. Sa faauo ma fiafia lava Mrs. Banks i taimi uma.
Ae o lenei aso ua avanoa le nofoa i le faapaologa. Sa foliga filemu le fale. E oo lava i le pusi a Mrs. Banks, o Chester, ua leai.
Na manatua e Roxy na fai mai lona tina ua ma’i Mrs. Banks. Sa alu o ia i le falemai i aso uma mo togafitiga. Sa lagona e Roxy le faanoanoa. Sa manao o ia e fai se mea manaia mo Mrs. Banks. Ae o le a?
Na tilotilo solo Roxy i pi o felelei mai lea fugalaau i lea fugalaau. Ona oso a‘e lea o sona manatu!
Sa tamoe atu Roxy i lona aiga ma piki se rosa mai lana togalaau. Sa toe foi atu o ia i le fale a Mrs. Banks ma tuu i lona faapaologa.
O le aso na sosoo ai sa tuu e Roxy se mataolela i luga o le nofoa o Mrs. Banks. Ma o le isi aso na sosoo ai, sa ia tuu ai se daisy i tafatafa o lona faitotoa i luma. O aso taitasi mo vaiaso e lua, e tuu ai e Roxy se fugalaau mo Mrs. Banks. Sa faaeteete o ia ina ne’i iloa atu o ia.
I se tasi aso a o agai atu i le fale, sa vaaia ai e Roxy Mrs. Banks o saofai i luma o le faapaologa. Sa ia uuina ni fugalaau i lona lima.
“Roxy,” na fai atu ai Mrs. Banks, “vaai i a’u fugalaau aulelei. Ua tuua e se tasi mo a’u. O aso taitasi e faatalitali mai ai se fugalaau fou mo a’u pe a ou taunuu i le fale mai le falemai.”
Sa ataata Roxy. “E te iloa po o ai?”
Sa ataata mai foi Mrs. Banks. “Po o ai lava, ou te fia faafetai atu ia i latou.”
“Atonu o se tasi e alofa ia te oe!” Na fai atu ai Roxy.
“Ia, sa ou tulimatai atu i le mauaina o se fugalaau fou i aso taitasi,” o le tala lea a Mrs. Banks. “O le fugalaau muamua sa i luga o lo’u faapaologa.”
“E te manatu na tu’ua e lau pusi?” O le fesili lea a Roxy.
“E fiafia Chester e tuu mai ia te a’u ni mea e ofo ai, ae na te le tuua lava ni fugalaau.” Sa ataata Mrs. Banks. “Ae faapefea le fugalaau i luga o lo’u nofoa?”
“O le taifau mai lalo le auala?” Sa ataata atili Roxy.
“I autafa o lo’u faitotoa i le pito i luma?”
“O se squirrel?”
“Auoi,” o le tala lea a Mrs. Banks, ma ata. “Ou te leʻi iloaina e tele naua meaola e alolofa iā te aʻu! Ae o fugalaau e mautinoa lava na fesoasoani ia te aʻu ia ou lagona le faatauaina.”
Na matuai faatumulia Roxy i le fiafia. Sa fiafia o ia sa ia fesoasoani ina ia toe ataata Mrs Banks.
Ata tusia mai le Adobe Stock