Taimi o Pesepesega Faatasi

Saunia e Grace Wilkins

(E faavae i se tala moni)

“O le taimi o pesepesega!” O le tala lea a Sister Yang. “Tatou amata i le ‘Tala o le Tusi a Mamona.’”

Sa nofo sa’o i luga Sara. Ua sauni o ia e pese! O se tasi lenei o pese e sili ona ia fiafia i ai.

Ona ia vaaia lea o se teineitiiti o nofo na o ia. E lei vaai lava Sara ia te ia i le Peraimeri.

Na pa’ō mai nota muamua i luga o le piano. Na amata ona pese Sara. “Tala o le Tusi a Mamona ua taua.”

Sa ia toe tilotilo atu i le laina. Sa lei pese le teineitiiti. Atonu na te lei iloaina ia upu.

Sa manao Sara e faasoa atu lana pese e fiafia i ai i le teineitiiti. Sa alu atu Sara e nofo i ona tafatafa. Na tepa mai i luga le teineitiiti ma ata.

Sa musumusu atu e Sara ia upu e sosoo ai. Sa la pepese faatasi. E lei umi ae mafai ona ia usuina upu uma!

Ua uma nei le taimi o pesepesega. “O ai lou igoa?” Na fesili ai Sara.

“O a’u o Alexa.” Sa ataata mai le teineitiiti. “Faafetai mo lau fesoasoani ia te a’u! O lo‘u taimi muamua lea i le Peraimeri.”

Sa ataata atu foi Sara. “Ua ou fiafia ua e i ai iinei!” Sa ia mautinoa o le a aoaoina e Alexa le tele o mea lelei—ma le tele o pese maoae!