Eseese ae le Tuuatoatasi
O nisi taimi o le avea ai o a’u na o se tagata o le Ekalesia sa lagona ai le tuuatoatasi.
Brrrrring! Sa tatagi le logo mo le vasega mulimuli o le aso. Ona o lea ua i ai Megan i le aoga tulaga lua, sa alu o ia i vasega eseese i le aso. Ma na tele naua mea e aoaoina. Sa fiafia Megan o lana vasega mulimuli e mo le suesue. O lona uiga e mafai ona ia amata i ana meaaoga.
Sa nofo i lalo Megan i se laulau avanoa. Sa savali atu se tamaitiiti e igoa ia Bennett ia te ia.
“Ei, Megan, o oe o le Mamona, a ea?”
“O a’u o se tagata O Le Ekalesia a Iesu Keriso o le Au Paia o Aso e Gata Ai,” na fai atu ai Megan.
“Ia, e te manatu na tusia e Iosefa Samita le Tusi a Mamona po o se mea faapena, a ea?” O le fesili lea a Bennett.
Sa faia e Megan se tatalo faatopetope ma le leoa ia iloa ai pe faapefea ona tali atu. “Sa ia faaliliuina le Tusi a Mamona,” o lana tala lea. “Na valaauina o ia e le Atua o se perofeta e fesoasoani e toe aumai le Ekalesia a Keriso.”
Sa faanunumi le isu o Bennett. “E valea lena mea,” o lana tala lea. Sa ata o ia ma savali ese atu.
Sa lagona e foliga o Megan le mafanafana. Na pulatoa o ia i lalo i lana tusi.
“Ei, Megan.”
O le a nei? Sa autilo a’e i luga Megan. “Oi. Malo, Taj.”
“Faamalie atu e uiga ia Bennett,” o le tala lea a Taj. Sa nofo ifo o ia i lalo faasaga mai ia te ia. “O le mea na e fai mai ai e foliga e taua ia te oe.”
“Faafetai,” o le tala lea a Megan. “E taua.”
“Ou te manatu ua ou iloa ou lagona,” o le tala lea a Taj. “Ua na o a’u le tagata Hindu i le aoga. E faigata pe a le taumafai tagata e malamalama i ou talitonuga.”
O nisi taimi sa lagona ai e Megan le tuuatoatasi ona na o le pau lea o le tagata o Le Ekalesia a Iesu Keriso o le Au Paia o Aso e Gata Ai i le latou aoga. Ae na te lei mafaufauina lava atonu e faapena foi lagona o isi tamaiti.
“Fai mai o’u matua afai e i ai se tasi e agaleaga o lona uiga latou te le lagonaina le fiafia i totonu,” o le tala lea a Megan. Sa ia faataamiloina se penitala i ona tamāilima. “Ou te mafaufau lava pe e lagona e Bennett le faanoanoa. Po o le tuuatoatasi.”
Sa faapio e Taj lona ulu. “Ou te mate e sa’o oe. Atonu na te manaomia se uo.”
Sa ataata Megan. “Atonu na te manaomia se toalua!”
O le aso na sosoo ai i le taimi o suesuega, na vaai ai Megan ma Taj o nofo na o Bennett i se laulau.
“Malo Bennett,” o le tala lea a Taj.
Sa foliga te’i Bennett. “Malo.”
“O le a le mea o loo e galue i ai?” Sa fesili atu ai Megan, ma saofai ifo i se nofoa.
“Talafaasolopito.”
“Mo le suega pu’upu’u taeao?” Sa nofo foi i lalo Taj.
“Ioe,” o le tala lea a Bennett.
“E tele mea e tatau ona manatua,” o le tala lea a Taj. Sa lue atu le ulu o Bennett.
“Masalo e mafai ona tatou fesili i le tasi ma le isi.” Sa tatala e Megan lana tusi o talafaasolopito. Sa feauauai i latou i le faia ma le taliina o fesili seia oo ina tatagi le logo.
“Ei, Megan, ou te faamalie atu e uiga i le mea na tupu ananafi,” o le tala lea a Bennett a o latou tutu e o. “Sa ou faalogo i nisi o mea e uiga i lau lotu ma sa ou fia iloa.” Sa ia savalivali i luma ma tua. “Ou te talitonu i mea eseese, ae sa tatau ona ou agalelei atu.”
Sa ataata Megan. “Faafetai. E taua la’u ekalesia ia te a’u, ae e le afaina pe a tatou talitonu i mea eseese.”
“Ou te manatu tatou te faia se vaega suesue lelei e tusa lava pe eseese o tatou talitonuga,” o le tala lea a Taj.
Sa ataata Bennett. “Faapena foi a’u. Ma ou te manatu o le a tatou tulaga lelei i lena suega puupuu.”
Ata na tusia e Mark Robison