O Vao ma Upu Leaga
“Aisea tatou te le faia ai se folafolaga faaleaiga?” O le fesili lea a Tina.
“E mafai ona ta talanoa?” Sa fesili atu ai Jonas ia Tina. Sa ia nofo i lalo i luga o le mutia i talaane o le mea sa ia veleina ai le vao o le togalaau.
“Ua lelei. O le a le mea o tupu?” O le fesili lea a Tina. Sa ia aveeseina ona totigilima fai-togalaau palapala.
“O ananei i le aoga sa fai ai e nisi tamaiti se upu ou te lei iloaina. Sa latou talie ina ua latou fai mai ai,” o le tala lea a Jonas. “Ou te manatu o se upu leaga.”
“O le a sou lagona ina ua e faalogo i le upu?” na fesili atu ai Tina.
“Ou te lei maua ai ni lagona lelei.”
Sa musumusu atu e Jonas le upu ia Tina. Sa ia ta‘u atu ia te ia le uiga. Na sa’o lava Jonas. E le o se upu lelei.
“Ae aisea e leaga ai?” sa ia fesili ai.
“E leaga aua e agaleaga ma e le faaaloalo. A tatou faaaogaina upu faapena, e faigata ai mo le Agaga Paia ona faatasi ma i tatou. Sa ta’u atu e le Agaga Paia ia te oe e leaga. O le mafuaaga lena e te le’i maua ai se lagona lelei i totonu.”
Sa faauu Jonas. “Ae o isi tamaiti sa foliga mai sa fiafia. Aisea ua na o a’u ai na lagona le le toafimalie?”
“E faapefea ona e iloa e lei mauaina e isi tamaiti na lagona?” O le fesili lea a Tina.
“Ona sa latou talie uma ma ataata ina ua fai mai e se tasi le upu.” Sa lagona e Jonas le le mautonu.
“O nisi taimi e talie pe ataata tagata pe a latou lagona le le toafimalie,” o le tala lea a Tina. “Ma o nisi taimi pe a latou faalogo pe fai soo atu ni upu leaga, e le toe faalavelave ia i latou. Ae e le sa’o lava le fai atu o na upu. E pei lava o nei vao. O lea ou te veleina ina ia mama ai le togalaau ma ia ola ai laau lelei.”
“Ua ou fiafia ou te le’i faia le upu,” o le tala lea a Jonas.
“ E faapena foi a’u,” na fai atu ai Tina. “Ua ou mitamita lava ia oe. Ma, e i ai so’u manatu. Aisea tatou te le faia ai se folafolaga faaleaiga?”
“O le a le ituaiga?” Sa fesili atu ai Jonas.
“Sei o tatou folafola e faaaoga upu lelei ae le o upu leaga. E mafai ona avea o se feagaiga faaleaiga.”
Sa fiafia Jonas i lena manatu. Sa faatalofa o ia ma Tina. Sa lagona e Jonas se lagona lelei e uiga i le folafolaga na ia faia ma Tina.
“Ia, ae a pe a e folafola mai e fesoasoani ia te a’u e faauma le veleina o le vao?” O le fesili lea a Tina. “Ona ou folafola atu lea e ave oe i le paka.”
Sa ataata Jonas ma piki i luga le suo. “O se tonu lelei lena.”
A o ia fesoasoani atu ia Tina, sa lagona e Jonas se lagona sili atu ona lelei. Sa ia iloa o le folafola atu e le faaaogaina upu leaga o se filifiliga lelei lea mo lo latou aiga.
Ata na tusia e Dan Widdowson