O Paionia i Atunuu Uma
O Moisés ma Peso
“E mafai ona ou totogiina foi la’u sefuluai?”
Sa tatala e Moisés le faitotoa ma savali atu i totonu o le faleoloa o vaega o taavale. Ua tuua le aoga, ma ua oo i le taimi e fesoasoani ai ia Papa i le galuega. Sa tago atu Moises i le pulumu ma amata ona salu. Na fiafia o ia e fesoasoani ia Papa. Sa mafai ai foi ona ia maua ai sina tupe.
E lei umi ae oo i le taimi e alu ai Moises. Sa ia faatofa atu ia Papa ma amata ona savali i le fale. Sa ia lagona le faanoanoa a o ia savali. E ese lava le lagona o le alu i le fale e aunoa ma Papa. Sa nonofo eseese matua o Moisés. Sa nonofo o ia ma ona tei e toafitu faatasi ma Mama. Sa ese le mea e nofo ai Papa. Sa faigaluega Mama i galuega e tolu ona e le’i tele ni latou tupe. Sa o se taimi faigata tele mo i latou uma.
I se tasi aso, sa tu’itu’i mai ai le faitotoa. O faifeautalai e toalua. Sa la faasoa mai se savali e faatatau ia Iesu Keriso. Sa la aoao mai foi e uiga i se perofeta e igoa ia Iosefa Samita. Sa lagona e Moises se lagona faapitoa i totonu a o ia faalogologo atu.
Sa faaauau pea le o mai o faifeautalai e aoao Moisés, Mama, ma nisi o ona tei. Na amata ona o atu Moisés ma lona aiga i le lotu. Na latou faitauina le Tusi a Mamona. Sa latou taofia le inu kofe. Na oo lava ina latou filifili e papatiso!
Sa aoaoina e Moises e alofa le Tama Faalelagi ia te ia. Ma e ui lava sa faigata pea mea mo lona aiga, ae sa ia lagonaina le mafanafana ma le filemu.
I se tasi po na tuai ai ona oo Moises i le fale mai le faleoloa a Papa. Sa saofai Mama i le laulau. Sa foliga popole o ia.
“O lelei mea uma?” O le fesili lea a Moises.
Sa mapuea Mama. “Ioe, o le a lelei mea uma mo i tatou.” Sa ia tuu atu ia Moisés se ataata vaivai. “Ua utiuti tupe i lenei masina. O loo ou popole e le lava le tatou tupe e totogi ai le sefuluai.”
Sa manatua e Moises le mea na aoaoina ai i latou e faifeautalai e uiga i le sefuluai. Na latou faimai o le avatu lea o le 10 pasene o au tupe i le Atua e fesoasoani ai e fai Lana galuega.
Na tuu e Mama ni nai peso i totonu o se teutusi ma faamauina. “E paia le tupe lenei!” o lana tala lea. “E tatau ona totogi le tatou sefuluai.”
Na mafaufau Moises i peso sa ia mauaina i le faleoloa taavale. Na ia aumaia i fafo mai lana taga. “E mafai ona ou totogiina foi la’u sefuluai?”
Sa ataata Mamá. “Ioe e mafai ona e faia.”
Ina ua mavae lena sa totogi e Moises lana sefuluai i taimi uma. I nisi taimi sa faigata. Ae sa faatuatua Moises. O ia o se paionia! Sa ia totogiina pea lana sefuluai, ma sa lava pea le faasoa a lona aiga. Sa faafetai Moisés mo auala na faamanuiaina ai o ia e le Tama Faalelagi mo le usiusitai.
O Mekisiko e sili atu tagata e tautatala i le gagana Sipaniolo nai lo se isi lava atunuu.
O le maile pito sili ona laitiiti i le lalolagi, o le chihuahua, na sau mai Mekisiko.
I le 1983 sa fausia ai le malumalu muamua i Mekisiko, a’o talavou Moises.
A o tamaitiiti o ia, sa fiafia Moises e taalo volipolo.
Elder Villanueva ma lana ava, o Leticia, e toatolu o la alo.
O le taimi nei, o loo auauna atu Elder Moisés Villanueva o se Fitugafulu Pulega Aoao.
Ata na tusia e Kelly Smith