Duatani ia e Sega ni Galili
Ena so na gauna e dau galili na bula ni da lewe ni Lotu duadua.
Brrrring! E taqiri na lali ena iotioti ni kalasi ni siga oya. Ia oqo ni sa tiko o Megan e koronivuli e loma, e dau gole ki na veikalasi duidui ena siga. Ka levu na ka me vulici. A marautaka o Megan na iotioti ni nona kalasi me gauna ni vuli lesoni. Sa kena ibalebale oqori ni sa rawa me cakava na nona homework.
A dabe sobu o Megan ena dua na teveli lala. A gole yani vua e dua na gonetagane na yacana o Bennett.
“Ei, Megan, o iko o Momani, e dina?”
“Au lewe ni Lotu i Jisu Karisito ni Yalododonu Edaidai,” tukuna o Megan.
“Ia, o nanuma o Josefa Simici a vola na iVola i Momani se dua na ka va ya, e dina?” A taroga o Bennett.
A cavuta vakatotolo o Megan e dua na masu lo, me kila na sala sauma kina. “A vakadewataka o koya na iVola i Momani,” e kaya o Megan. “A kacivi koya na Kalou me dua na parofita me veivuke ena kena kau lesu mai na Lotu i Karisito.”
A vakatara na ucuna o Bennett. “Dua na sega ni macala oya,” a kaya o koya. A dredre o koya ka lako tani.
A katakata na matai Megan. A raica sobu o Megan na nona ivola.
“Ei, Megan.”
Na cava beka qo? Rai cake o Megan. “Isa. Bula, Taj.”
“Kere veivosoti baleti Bennett,” a kaya o Taj. A dabe veibasai mai vua. “Na veika o tukuna tiko e rogorogo bibi vei iko.”
“Vinaka,” a kaya o Megan. “E vakakina!”
“Au vakabauta niu kila na veika o vakila,” e kaya o Taj. “O au duadua ga na Hindu e koronivuli. E dau dredre ni ra segata na tamata me ra kila na nomu vakabauta. ”
Eso na gauna e dau galili o Megan ni sa leweni lotu duadua ni Lotu i Jisu Karisito ni Yalododonu Edaidai ena nodratou koronivuli. Ia e sega vakadua ni nanuma ni ra na vakila talega na vo ni gone na vakila oya.
“Erau kaya na noqu itubutubu ni dua e sega ni vinaka nona itovo vei keda kena ibalebale ni ra sega ni marau e lomadra,” e kaya o Megan. A wavokita na nona iqaqalo e dua na penikau. “Au vakataroga ke rarawa tiko o Bennett. Se galili. ”
A tosoya na uluna o Taj. “Au vakabauta ni ko dina. E rairai e gadreva beka e dua na itokani. ”
A dredre o Megan. “E rairai gadreva beka e rua!”
Ena siga ka tarava ena gauna ni vuli, erau raici Bennett o Megan kei Taj ni dabe duadua toka ena dua na teveli.
“Bula, Bennett,” a kaya o Taj.
A kurabui o Bennett. “Bula.”
“Na cava o cakava tiko?” A taroga o Megan, ka sirova yani e dua na idabedabe.
“iTukutuku Makawa.”
“Me baleta na kilakila ni mataka?” A dabe talega o Taj.
“Yup,” a kaya o Bennett.
“E levu na ka me da nanuma,” a kaya o Taj. A deguvacu o Bennett.
“E rawa beka ni tou veitarogi vata mada.” A dolava o Megan na nona ivola ni itukutuku makawa. Era veivukevuke ena nodra taroga ka sauma na taro me yacova ni sa taqiri na lali.
“Ei, Megan, vosoti au ena noa,” a kaya o Bennett ni rau tucake me rau veitalatala. “Au rogoca eso na ka me baleta na nomu lotu kau lomatarotaro.” Veitosoyaki na yavana. “Au vakabauta na veika duidui eso, ia e dodonu meu vakaraitaka ena itovo vinaka.”
A matadredredre o Megan. “Vinaka.” E bibi vei au na noqu lotu, ia e sa donu kevaka eda vakabauta na veika duidui. ”
“Au vakabauta ni tou ilawalawa vinaka ni vulilesoni kevaka mada ga e duidui noda vakabauta,” a kaya o Taj.
Dredre o Bennett. “O au talega.” Kau vakabauta ni tou na maka vinaka ena kilakila oya. ”
Droini mai vei Mark Robison