iVuvu ena Vanua Kecega
Vakabula na Siga o Margaret
Sa dromu tiko na waqa! Na cava ena rawa ni cakava o Margaret?
A tucake tu ena muana eliu o Margaret ka rai yani ki na wai karakarawa e wavoliti koya tu. A vaqiqi cake ka lako sobu na waqa ena tamatamani ua lelevu.
Eratou a volitaka na matavuvale nei Margaret e voleka ni ka kece eratou taukena me ratou soko ki Amerika. Ena taura e ono na macawa na ilakolako oqo. Sa rarawa o Margaret ena nodratou sa biuta mai na nodratou vale mai Welesi. Ia sa marautaka talega o koya na nodratou itikotiko vou.
Ni vo toka e vica na vula, ratou sota na matavuvale nei Margaret kei rau na daukaulotu mai na Na Lotu i Jisu Karisito ni Yalododonu Edaidai. Eratou a papitaiso kina o Margaret kei rau na nona itubutubu. Ia oqo me ratou na tomani ira na Yalododonu tale e Saioni.
A dredre sara na ilakolako oya. A tauvimate o tinai Margaret. Ka sa tauvimate tu o tamana mai na veiyabaki ni cakacaka tiko ena qara ni gasaukuro. Sa qai qaravi rau o Margaret. A qarava talega o koya na tacina lailai kei na ganena gone. Sa dua dina na cakacaka levu. Ia a sega ni kudruvaka o Margaret.
Ena so na gauna ni veibaleyaki vakalevu na waqa e wai e vakila o Margaret ni sa yavavala na ketena ka vakatauvimatetaki koya. Ena so tale na gauna e dau rere. Ni sa rere, a boboka na matana ka kere veivuke vua na Tamada Vakalomalagi.
Ena dua na siga a rogoca o Margaret na kaila. “E tiko e dua na turu ena waqa! Eda sa dromu tiko!”
Era sa lomaleqa kece. Sa tukuna o kavetani vei ira kece mera vaqara vokete. Era calova laivi na wai na tamata ena vokete me ra nimata na waqa.
A via veivuke o Margaret. A tekiduru ena yasa ni nona idavodavo ka masu vakaukauwa ena nona igu kece. “Yalovinaka na Tamada Vakalomalagi, ni vukei au meu vakasamataka eso na sala meu veivuke kina.”
E dua na yalo vakacegu e vakasinaita na yaloi Margaret. E kila o koya ni Tamada Vakalomalagi sa wanonovi koya tiko. Ena vukei ira o Koya.
Sa qai yaco mai vua e dua na vakasama.
A dreta e rua na itutuvi vuti ni sipi vulavula mai nona idavodavo ka cici yani me vaqarai kavetani. “Qori,” a kaya o koya. “Biuta oqori ena qara me tarova na turu.”
A taleitaka o kavetani na vakasama nei Margaret. Sa sosomaka sara okoya na itutuvi ki na qara. A qai sovaraka mai e dua na vokete levu ni kuluta ena delana. Ni sa batabata na kuluta, sa sogota vinaka sara na turu!
“Vinaka vakalevu nomu solia na nomu itutuvi,” a kaya o kavetani. “Na totolo ni nomu vakasama e vakabula na siga.”
A matadredredre o Margaret. A sauma na Tamada Vakalomalagi na nona masu. Na nona ilakolako ni painia e se qai tekivu walega, ka kila ni na vukei koya o Koya ena veikalawa yadua ni nona ilakolako.
A lako mai na imatai ni daukaulotu ki Welesi ena 1840.
E dua na koro mai Welesi e tiko kina na yaca ni tauni balavu duadua e vuravura.
E levu cake na sipi e Welesi mai vei ira na tamata!
A yabaki 11 tiko o Margaret Griffiths ena gauna a papitaiso kina.
Ni sa tubu cake mai o Margaret, a vakamau ka walu na luvena.
A veiqaravi vakaperesitedi ni iSoqosoqo ni Veivukei ena 26 na yabaki.
Droini mai vei Laura Catrinella