Oktak bōtaab Ejjab Makeļo̧k
Jet iien make wōt membōr in Kabun̄ in ekar ajimakeke.
Brrrrring! Beeļ eo ekar jan̄ n̄an kūlaaj eo āliktata an raan eo. Kiiō ke Megan ekar pād ilo middle school, liin ekar etal n̄an kūlaaj ko rooktak ilo raan eo. Im ekar kanooj lōn̄ n̄an ekkatak. Megan ekar m̧ōņōņō ekar kūlaaj eo an āliktata n̄an iien ekkatak eo an. Bwe ekar meļeļe in emaron̄ in kar jino kōm̧m̧ani homework ko an.
Megan ekar jijet ilo juon tebōļ ejjeļo̧k kobban. Juon ļaddik kar etan Bennett ekar etal n̄an ippān.
“A, Megan, kwoj juon Mormon, ejimwe ke?”
Ij juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata, Megan ekar ba.”
“Kōn menin, kwoj ļōmņak Josep Smith ekar je Bok in Mormon ak jabdewōt, ejim̧we ke?” Bennett ekar kajjitōk.
Megan ekar m̧ōkaj an kōm̧m̧ane juon jar em̧ōkaj, ejjeļo̧k ainikien n̄an jeļā kilen uwaak. “E ekar ukōt Bok in Mormon,” liin ekar ba. “Anij ekar kūr e āinwōt juon rikanaan n̄an jipan̄ kōro̧o̧ltok Kabun̄ eo an Kraist.”
Bennett ekar nukij bo̧o̧tin. “Eban” ekar ba. Ļein ekar ettōn̄ im etal jān e.
Turin mejān Megan ekar okmāņeņ. Liin ekar kalimjōk bok eo an.
“A, Megan.”
Ta kiiō? Megan ekar reilōn̄ļo̧k “O. Iakwe, Taj.”
“Joļo̧k bōd kōn Bennett,” Taj ekar ba Ļein ekar jijet laļļok jān liin. “Ta eo kwar ba ekar āinwōt aorōk n̄an kwe.”
“Kom̧m̧ool,” Megan ekar ba. “Eaorōk.”
“Ij ļōmņak ijeļā ekōjkan am̧ en̄jake,” Taj ekar ba. “N̄a wōt Hindu ilo jikuuļ. Epen n̄e armej rejjab kajjieon̄ meļeļe tōmak ko am̧.”
Megan jet iien ekar en̄jake ajimekek āinwōt e wōt membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo jikuuļ eo aer. Bōtaab liin ekar jab ļōmņak bwe ajri ro jet remaron̄ kar en̄jake ejja in wōt.
“Ro jinō im jema ej ba bwe n̄e juon ej lāj ej kōnke rejjab en̄jake m̧ōņōņō itulowa,” Megan ekar ba. Liin ekar kōro̧o̧l juon pinjeļ ilo add in pein. “Ij ļōmņak eļan̄n̄e Bennett ej en̄jake būrom̧ōj. Ak makeļo̧k.”
Taj ekar kōm̧ajidjid bōran. “Ij ba kwoj m̧ool. Bōlen ej aikuji juon m̧ōttan.”
Megan ekar ūjō. “Bōlen ej aikuji ruo!”
Raan eo juon ilo iien ekkatak eo, Megan im Taj raar lo Bennett jijet makeļo̧k ilo juon tebōļ.
“Iakwe, Bennett,” Taj ekar ba.
Bennett ekar bwilōn̄. “Iakwe.”
“Ta ņe kwoj jerbale?” Megan ekar kajjitōk, jijet laļļo̧k ilo juno jea.
“History.”
“N̄an teej eo iluj?” Taj ej jijet laļļo̧k barāinwōt.
“In̄n̄ā,” Bennett ekar ba.
“Ekanooj lōn̄ n̄an keememeji,” Taj ekar ba. Bennett ekar m̧aidikdik.
“Bōlen jemaron̄ teej doon.” Megan ekar kōpeļļo̧k bok in history eo an. Raar take doon kajjitōk im uwaaki kajjitōk ko m̧ae iien beeļ eo ekar jan̄.
“A, Megan, joļo̧k aō bōd kōn inne,” Bennett ekar ba ke raar jutak in ilo̧k. “Ikar ron̄ jet men ko kōn kabun̄ eo am̧ im kar lukkuun kōņaan jeļā.” Ekar wallik wōnm̧aan ioon neen. “Ij tōmak men ko roktak jān doon, bōtaab ij aikuj in kar em̧manļo̧k.”
Megan ekar ettōn̄. “Kom̧m̧ool. Kabun̄ eo aō eaorōk n̄an n̄a, bōtaab em̧m̧an eļan̄n̄e jej tōmak men ko rooktak jān doon.”
“Ij ļōmņak jej kōm̧m̧ane juon kumi in ekkatak em̧m̧an jekdo̧o̧n eļan̄n̄e tōmak ko ad rooktak jān doon,” Taj ekar ba.
Bennett ekar ettōn̄ dikdik. “Bar n̄a. Im ij ļōmņak enaaj em̧m̧an ad kōm̧m̧ane quiz eo.”
Kōmeļeļe ko jān Mark Robison