O Kuki, Opo, ma le Alofa
“O le a le tutusa le Kerisimasi i lenei tausaga,” o le tala lea a Eva.
Sa tu Eva i ona tamaivae. Sa aapa atu o ia mo le pusa i totonu o le kapoti.
“Ua i ai!” o lana tala lea.
Sa ia tatalaina le pusa. O totonu o ni tamai faatusa o le Soifua Mai o Iesu na faia i le ele mūmū. Sa ia aveina i fafo ma tuu le pepe o Iesu i le faatanoa vao.
Ona oo lea i le taimi e teuteu ai le laau Kerisimasi. Sa fesoasoani Eva ia Mama ma lona tuagane laitiiti, o Nefi, e tautau ni manoa o moli ma fualaau manzanillas. Sa fiafia Eva i le manogi manaia o fualaau aina samasama ninii. Ina ua sau Papa i le fale, sa ia fesoasoani ia Eva ma Nefi e tuu le fetu i le pito i luga o le laau.
Sa fiafia Eva i nisi o a latou tu masani o le Kerisimasi sa tutusa lava i lenei tausaga. O isi mea uma na lagonaina le matuai ese lava.
I ni nai vaiaso talu ai, sa taia ai lo latou aai i Kuatemala i se afā. Sa faaleagaina e timuga ma matagi mamafa le tele o fale. O nisi tagata sa nonofo pea i malutaga. Ma e toatele o tagata sa mama’i ona o le vairasi o le KOVITI-19.
E masani lava i le Po o le Kerisimasi, na o mai ai fafine, tamaloloa o le aiga, ma tausoga o Eva mo se pati tele. Na umi ona feala Eva ma Nefi. Sa latou faia ni ponche (vaiinu) ma o la fafine o aiga ma taaalo ma o la tausoga. I le vaeluaga o le po, sa o atu ai tagata uma i magaala, faamūmū mea faapāpā, ma tuuina atu ni opo i uo ma tuaoi.
Ae o le tausaga lenei, sa le mafai ona o mai tagata o o latou aiga e asiasi mai. Ma o le a leai ni opo o le Vaeluaga o le Kerisimasi i magaala.
Sa lagona e Eva le faanoanoa i mea malie uma o le a ia misia. “O le a le tutusa le Kerisimasi i lenei tausaga,” o lana tala lea.
Sa luelue le ulu o Papa. “E ese lava. Ae o loo i ai ia i ma’ua ma Mama se manatu e ono faafiafiaina ai oe.”
“O le Kerisimasi e faatatau i le foai atu,” o le tala lea a Mama. “E te manao e fesoasoani mai ia i ma’ua e faatau ni meaai mo aiga o e na leaga o latou fale i le afa?”
“Ua lelei!” Na fai atu ai Eva. Sa lue atu le ulu o Nefi.
Sa o atu Eva ma Nefi ma Mama i le faleoloa. Sa fesoasoani Eva e tuu meaai i totonu o ato faatau. Ona oso a‘e lea o sona manatu!
“Mama,” sa ia fai mai ai, “e mafai ona e fesoasoani ia Nefi ma a’u e tao ni kuki mo tamaiti i totonu o le malutaga? E mafai ona tatou kilivaina pe a tatou o e momoli meaai!”
Na malie i ai Mama. Sa faaalu e Eva, Nefi, ma Mama ni nai aso e tao faatasi ai kuki. Sa tuu e Eva ma Nefi kuki i ni tamai taga pepa ma nonoa i ni lipine. Ona latou fai lea o a latou ufi fofoga ma savavali faatasi ma Mama ma Papa i le malutaga lea sa nonofo ai aiga.
“E toatele tamaiti iinei,” o le tala lea a Nefi. “Mata o le a lava a tatou kuki?”
“Talosia. Fai se tatou tatalo,” na fai atu ai Eva. Sa moeiini o latou mata. Sa tatalo lemu Eva, “Tama Faalelagi, faamolemole fesoasoani mai ia i matou ina ia mafai e tagata uma iinei ona lagona Lou alofa.”
Sa tutu tamaiti i totonu o le malutaga i se laina umi. Sa tuuina atu e Eva ma Nefi i tamaiti taitasi se afifi o kuki. Sa lava mo tagata uma!
A o latou savavali atu i le fale, sa le’i toe lagona e Eva le faanoanoa. Sa i ai se ataata lapoa i ona foliga. Sa le’i mafai ona ia tuuina atu ni opo i ana uo i le Po o le Kerisimasi. Ae o afifi taitasi o kuki sa pei o se opo mai lona loto.
E tautatala Eva ma Nefi i se gagana e ta’ua o le Q’eqchi’. Ua latou fiafia ua fausia se malumalu fou i Cobán, e latalata i lo latou fale!
Ata na tusia e Jimmy Holder