O Le Fetu o le Fanau Mai
O le a se vaega e mafai ona faatino e Cayden i le tala o le Fanau Mai o Iesu?
O le Po o le Kerisimasi. O lona uiga ua oo i le taimi mo le tala faatino o le Fanau Mai o Iesu! O le faatinoina o le tala i le soifua mai o Iesu Keriso o se tasi o tu masani o le Kerisimasi e sili ona fiafia i ai Cayden.
Sa aumai i fafo e Tama le pusa o teuga. “O ai e te manao e avea ai i lenei tausaga?” na ia fesili atu ai i le uso ma le tuafafine laitiiti o Cayden.
“O le a avea a’u ma Iosefa!” Na fai mai ai Grant. Sa ia aapa atu i totonu o le pusa ma toso mai ni teuga.
“E mafai ona avea a’u ma Maria?” na fesili atu ai Hannah. Sa lue atu le ulu o Tina ma tuu atu ia te ia se pepe meataalo. Sa afifi ma le faaeteete e Hana le pepe meataalo i totonu o se palanikeke ma tuu i totonu o se tamai pusa e pei o se faatanoa vao.
Sa ataata Cayden. Sa manao Hana e faatino le vaega a Maria i tausaga taitasi.
“O le a avea a’u ma se leoleo mamoe,” o le tala lea a Brynne, le tuafafine matua o Cayden. Sa ia uu maia se manu vaefa. “Ma o la’u mamoe lea.”
“O Tina o le a avea ma se agelu aulelei,” o le tala lea a Tama.
Na ataata Tina. “Vaai i le atamai o Tama? O le a ia faatinoina se Makoi.”
“E manaomia se tagata malosi e avea ma asini.” O le uso matua o Cayden, o Scott, na faaali mai ona maso. “Ou te matea o a’u lena.”
“Ae a oe, Cayden?” O le fesili lea a Tama. “O le a le vaega e te manao e faatino?”
Sa filemu Cayden. Ona maua lea o sona manatu.
Sa tamoe o ia e aumai le palanikeke samasama mai lona moega. Sa ia tuu i luga e vaai i ai Tama. “O se vaega tatou te le’i faatinoina muamua. Ou te fia avea ma fetu. Lea e faasino atu ai le ala ia Iesu.”
“O se manatu manaia tele lena!” na fai atu ai Tamā.
Sa latou faia uma a latou teuga. Sa aui e Cayden le palanikeke samasama i ona tauau. Ona faitau lea e Tama le tala mai tusitusiga paia.
Sa ataata Cayden a o alu ifo Scott i ona lima ma tulivae e avea ma asini. Sa tuu e Tama Hana i lona tua e avea ma Maria. O Grant, sa avea ma Iosefa, sa taumafai e taofi o ia a o la savavali atu i le isi itu o le potu. Sa faalogologo ma le totoa Cayden. Sa ia iloa ua oo mai lana vaega.
“Ma faauta, o le a i ai se fetu fou e oso mai,” na faitau ai Tama.*
Sa tu maualuga Cayden ma faaloaloa lautele atu ona lima. Sa ia mafaufau i le fetu lea na susulu atu i Peteleema. Sa manao o ia e fesoasoani i tagata ia maua Iesu, e pei lava ona sa faia e le fetu i lena po o le Kerisimasi muamua.
Ata na tusia e Agnes Saccani