O Faatusa o le Kerisimasi
O se gaoioiga lenei o le Kerisimasi e mafai ona e faia mo le po faaleaiga!
1
O le Kerisimasi o se taimi faapitoa o le tausaga. Tatou te usuina ni pese fiafia. Tatou te teuteuina o tatou fale. Ma e tatou te tuuina atu i le tasi ma le isi meaalofa. E matuai manaia lava! Ae o meaalofa felanulanuai ma teuga e i ai foi se uiga faapitoa. Latou te faamanatu mai ia i tatou e uiga ia Iesu Keriso, Lona soifua mai, ma mea uma na Ia tuuina mai ia i tatou. Latou te fesoasoani ia i tatou ia manatua le mafuaaga moni tatou te faamanatuina ai le Kerisimasi.
Usu le: “Sa I Ai i le Fale o Manu” (Tusipese a Tamaiti, 25)
2
I le lalolagi atoa, o tagata uma e i ai laau Kerisimasi. O nisi tagata e teuteuina laau o mago po o fa’i. E toatele tagata e faaaogaina se laau e lanumeamata i taimi uma. O se laau e lanumeamata i taimi uma e tumau lona lanumeamata i le tausaga atoa. E mafai ona faamanatu mai ai ia i tatou ua tuuina mai e Iesu ia i tatou le ola e faavavau.
3
O le lanu mumu o se faatusa taua foi o le Kerisimasi. O le mumu e mafai ona fesoasoani ia i tatou e manatua ai le Togiola a le Faaola ma le toto na Ia faamaligiina mo i tatou taitoatasi. E mafai foi ona fesoasoani tatou te tulimatai atu ai i Lona Afio Mai Faalua, pe a Ia ofuina se ofu talaloa mumu!
4
O lole tootoo e foliga e pei o laau e faaaoga e leoleo mamoe e taitai ai a latou mamoe. E mafai ona latou faamanatu mai ia i tatou leoleo mamoe o e na o mai e vaai i le pepe o Iesu. E mafai foi ona latou faamanatu mai ia i tatou o Iesu Keriso o le Leoleo Mamoe Lelei. O le a Ia taitaia i tatou i le saogalemu ma le filemu.
5
Ua i ai moli i soo se mea i le Kerisimasi. E pei i latou o le fetu na susulu i le lagi ina ua soifua mai Iesu Keriso. Sa mulimuli leoleo mamoe ma le Au Makoi i le fetu e saili ia te Ia. E mafai ona tatou filifili e mulimuli foi ia te Ia.
Usu le: “O Fetu na Pupula” (Tusipese a Tamaiti, 24)
6
E tagitagi logo e ta’u mai ai tala fiafia. O logo i le Kerisimasi e mafai ona faamanatu mai ia i tatou tala fiafia o le soifua mai ma le Togiola a Iesu Keriso.
7
Na avatu e le Au Makoi meaalofa ia Iesu. Tatou te tuuina atu foi meaalofa i le Kerisimasi. E mafai ona latou faamanatu mai ia i tatou mea matagofie uma ua tuuina mai e le Tama Faalelagi ma lo tatou Faaola ia i tatou. Manatua o Iesu o le meaalofa moni o le Kerisimasi!
8
Matou te faamoemoe o moli, teuteuga, ma le fiafia o le Kerisimasi e faatumulia ai outou i le olioli ma le mafanafana. Talosia ia taitasi i latou ma faamanatu atu ia te outou ia Iesu Keriso ma mea uma ua Ia faia mo i tatou. Manuia le Kerisimasi!
Usu le: “Le Lalolagi ia Fiafia” (Viiga, nu. 113)
Ata na tusia e Thomas S. Child