O Le Urosa Viole
Sa le’i fiafia Liam i lana meaalofa o le Kerisimasi.
I le taeao o le Kerisimasi, sa vave ala i luga Liam. Sa ia tolotolo atu i totonu o le potu malolo faatasi ma ona tuafafine laiti e toalua, o Holly ma Sara. O iina, sa tautau ai totini na su’i i le fale e fitu i se atulaina. O nisi sa laiti ma lautele. O nisi sa uumi ma manifinifi. Ma o nisi na tuai tele ua matafi o latou lanu. Ae o le mea taua mo Liam o totini taitasi sa faatumulia i meaai suamalie manaia.
Sa uu mai e Liam lana totini ma faau i lalo. Na faanonou o ia. Sa i ai se lole tootoo se tasi, o se moli, ma ni nai meaai suamalie.
“Na o le pau lea?” na ia fesili atu ai.
Sa faanonou foi Holly ma Sara. Ona ataata lea o Liam. Atonu o lona uiga o lana meaalofa o le a lelei tele! Sa faamoemoe o ia o le taaloga vitio fou lea sa taaalo uma ai ana uo.
Ae ina ua tatala e Liam lana meaalofa, sa na o na faatupulaia o lona lē fiafia. O lana meaalofa o se urosa lanu viole. Na su’ilima, ma ni mata faamau lanu uliuli ma sina ataata laitiiti na su’ilima.
“Manuia le Kerisimasi, Liam,” o le tala lea a Tina ma se ataata tele.
Sa le’i ataata Liam. E le o le meaalofa lea sa ia manao ai.
Sa maua foi e ona tuafafine laiti ni manu utu, ma sa faapena foi ona tuafafine matutua e toatolu. Ae e le’i maua ai e ia se lagona sili atu. O le Kerisimasi aupito sili lea ona leaga!
“O le a le mea ua tupu?” sa fesili atu ai lona tuafafine matua o Erin ina ua mae’a le taumafataga o le taeao. “Sa e le fiafia i le taeao atoa.”
“Ou te le fiafia tele i la’u meaalofa,” o lana tala lea. “Ua na o se urosa sa gaosia e Tina. Aisea na te le’i tuuina mai ai ia te a’u se mea sa ou manao ai?”
Sa ataata Erin. “Sau ta o.”
Sa ia aveina o ia i le potumoe o Tina ma tusi atu i le laau suisui tuai i luga o le laulau.
“O le laau suisui a Tina,” o lana tala lea. “E a la?”
“O a isi mea o e vaai i ai?”
Sa faanonou Liam. Sa ia vaaia nila suisui, filo felanulanuai, ma ni fasi ie ua gaugau. Sa ia vaaia foi se taga o vavae, vaivai ma felefele e pei o se ao.
“Ou te iloa na e manao ia Tina e faatau mo oe se isi mea mo le Kerisimasi,” o le tala lea a Erin. “Ae e le o ia i tatou ni tupe mo lena mea. Ou te fiafia i le urosa sa faia e Tina mo a’u. O loo faaalia ai le tele o lona alofa ia te a’u.”
“O le a le uiga o lau tala?”
“E alu se taimi tele e fai ai se meataalo utu. E manaomia ai le onosai. Sa saofai Tina i lenei laulau mo le tele o itula i le faia o se meataalo mo i tatou taitoatasi. Sa ia faamautinoa ua tofu i tatou ma se meaalofa. E te le manatu o lona uiga e alofa o ia ia i tatou?”
Sa pa’i atu Liam i le ie lanu viole lea sa faaaoga e Tina e fai ai lana urosa. Atonu sa sa’o Erin. E le’i manaomia ona atoatoa se meaalofa ia avea ai ma se meaalofa lelei. I le Peraimeri, sa aoao ai e Liam o Iesu o le meaalofa aupito silisili, ma sa soifua mai Iesu i se fale o manu faatauvaa.
Sa tamoe Liam e sue Tina. Sa ia tuu atu ia te ia se opo lapo’a. “Faafetai lava mo le urosa,” na ia fai mai ai.
Na te le’i manatu ua faatauvaa tele le urosa i le taimi nei. E tusa lava pe leai ni meaalofa, sa ia lagonaina le alofa o lona aiga. Ma o lena mea na avea ai o se Kerisimasi faapitoa.
Ata na tusia e Debby Rahmalia