Ang Makalipay nga Mubong Sulat
“Usahay bisan ang mga magtutudlo makulbaan,” miingon si Papa.
“Welcome sa klase, kaninyong tanan.”
Si Riley mitan-aw sa iyang bag-o nga magtutudlo ug mipahiyom. Mas batan-on siyang tan-awon kay sa uban niya nga mga magtutudlo. Ang iyang tingog nagpanuko samtang siya misulti. Miigham siya ug mipadayon.
“Ako si Mr. Berrett.”
Usa ka estudyante mipataas sa iyang kamot. “Bag-o ka?” Nangutana siya.
“Oo. Mao pa lang ang akong paggradwar gikan sa kolehiyo. Kamo ang akong pinaka una nga klase.”
Dayon si Mr. Berrett mipasabot unsa ang makat-onan sa klase. Hinay siya nga namulong. Usahay dili kaayo siya madungog.
Si Riley makadungog sa mga bata nga maghinunghongay sa iyang luyo. Kana nakapahimo pa nga mas dili kaayo madungog ang unsay gisulti ni Mr. Berrett. Apan gibuhat ni Riley ang iyang labing maayo sa pagpaminaw. Sa dihang si Mr. Berrett mitan-aw niya, mipahiyom siya.
Atol sa panihapon nianang gabhiona, si Mama nangutana kabahin sa unang adlaw ni Riley sa eskwelahan.
“Ganahan ko sa akong mga klase ug sa akong mga magtutudlo,” miingon si Riley. “Duna kami usa ka magtutudlo nga bag-o. Mura siya og gikulbaan. Gikataw-an siya sa ubang mga bata.”
“Usahay bisan ang mga magtutudlo makulbaan,” miingon si Papa.
Mipahiyom si Mama. “Nalipay ko nga anaa ka didto aron moabiba niya.”
Pagkasunod adlaw, si Riley nakadungog sa uban nga mga bata nga nag-istorya diha sa hawanan.
“Aduna sab koy Mr. Berrett,” miingon ang usa nila. “Dili gyod gani ko makadungog niya gahapon.”
“Nakadungog mo sa iyang tingog nga nagpanuko?”
“Lisod gyod kaayo ning tuiga,” laing mga bata miingon. Nangatawa silang tanan.
Naghunahuna si Riley kabahin sa unsay gisulti ni Papa kabahin sa mga magtutudlo nga makulbaan usab. Gahapon mao ang unang adlaw ni Mr. Berrett sa eskwelahan. Hadlok gyod tingali kadto kaayo. Miingon si mama aron pagdasig niya. Unsaon man kana paghimo ni Riley?
Sa dihang nag-ampo si Riley nianang gabhiona, siya mihangyo sa Langitnong Amahan sa pagpahibalo kaniya kon unsaon sa pagtabang ni Mr. Berrett.
Sa sunod adlaw, si Riley miukab sa iyang bawon sa paniudto. Sa sulod mao ang usa ka mubo nga sulat gikan ni Mama. “Talagsaon ka!” mao ang sulti niini. Mipahiyom si Riley. Ganahan siya sa mubo nga sulat ni Mama. Gitawag kini sa iyang pamilya og “mubo nga mga makalipay nga sulat.”
Mao ra kadto! Si Riley ug ang iyang mga klasmeyt makasulat og usa ka mubo nga makalipay nga sulat alang ni Mr. Berrett!
Gidapit ni Riley ang pipila sa iyang mga klasmeyt aron mag-abot sa iyang panimalay human sa klase. Nagdayan-dayan sila ug usa ka dako, hayag nga poster nga adunay smiley nga mga panagway ug mga bitoon. Gisulat nila ang mga butang nga ilang nagustohan kabahin ni Mr. Berrett. Gisulat nila ang mga butang nga ila nang nakat-onan gikan kaniya. Ug misulti sila niya nga sila nalipay nga siya ang ilang magtutudlo.
Pagkasunod adlaw, si Riley ug ang pipila ka higala miadto og sayo sa eskwelahan. Gibitay nila ang poster diha sa pultahan sa klasehanan ni Mr. Berrett. Dayon nanago sila sa suok aron tan-awon unsa ang mahitabo.
Wala magdugay si Mr. Berrett miadto sa iyang klasehanan. “Oh!” miingon siya. Si Riley ug ang iyang mga klasmeyt nagtan-aw niya nga mibasa sa ilang mga mubo nga sulat. Usa ka dakong pahiyom ang mihulma sa iyang nawong.
Sa dihang nakita ni Riley kon unsa siya ka lipay, mibati usab siya og kalipay. Mipahiyom siya ug nakig-apir sa iyang mga higala.
Samtang sila nanglakaw, si Riley nakadungog og tawo nga miingon, “Naghinamhinam nako nga moadto sa klase ni Mr. Berrett karon!” Naghinamhinam usab si Riley.
Mga paghulagway pinaagi ni Kübra Teber