Nawala ug Nakit-an nga mga Higala
Makakita kaha og laing higala si Leah?
Si Leah mitan-aw sa palibot sa lawak klasehanan sa grade three. Ang mga lamesa maayong pagkalaray, ug nagbitay sa mga bungbong ang hayag nga mga poster. Kadaghanan sa ubang mga bata nakig-istorya sa ilang mga higala.
Milingkod si Leah sa lingkoranan diha sa iyang lamesa. Wala gayod siyay bisan usa nga nailhan niini nga klase. Naglaom siya nga makabaton siya og bag-o nga higala sa eskwelahan niining tuiga.
“Kumusta.”
Mihangad si Leah. Mitupad kaniya ang usa babaye.
“Ako si Anna,” miingon siya. “Gusto ka nga magkahigalaay ta?”
Mipahiyom si Leah. “Sige ba!”
Pagkataudtaod nagdungan si Leah ug Anna sa pagpangaon og paniudto. Atol sa ilang pahulay, nagdula sila og four square ug paglukso sa pisi. Sa kataposan sa adlaw, nanamilit si Anna ngadto kang Leah diha sa bentana sa bus. “Magkita ta ugma!” miingon siya.
Sukad niadto, nahimong maayo nga mga managhigala si Leah ug Anna. Magkauban silang nagdula kada adlaw. Atol sa tingtugnaw, naghimo sila og tag-as nga agianan diha sa niyebe. Kon mokaging na ang niyebe, mopadakin-as sila diha sa mga agianan. Usa ka higayon managkauban sila alang sa usa ka proyekto sa siyensiya mahitungod sa kawanangan. Nalingaw si Leah sa paghimo og poster sa mga planeta uban ni Anna.
Apan usa ka adlaw nagsugod si Anna nga lahi ang linihokan. Wala siya mokaway og balik ngadto ni Leah sa buntag. Mitipon siya og bag-ong grupo alang sa pagbansay sa math. Ug atol sa tingpaniudto, wala kaayo siya moistorya.
“Kumusta, nangutana si Leah, “unsay nahitabo?”
Nanghupaw si Anna. “Paminaw, dili na seguro kaayo kita magkuyog. Miingon ang akong higala nga si Audrey nga lahi kuno ka.”
“Mao ba.” Mikunot ang agtang ni Leah. Siya ug si Anna nalingaw nga magkauban. Nganong mabalaka man og maayo si Anna mahitungod sa unsay gihunahuna sa ubang mga bata?
Miingon si Anna nga pwede gihapon silang mahimong higala, apan human niana, wala na gayod siya makig-istorya kang Leah. Naningkamot si Leah nga dili mobati nga masakitan, apan lisod kadto nga mag-inusara lang siya samtang si Anna nakigdula sa ubang mga bata.
Wala madugay natapos ang tuig sa ting-eskwela, ug ang ilang bakasyon sa ting-init nagsugod na. Nagpabiling bisi si Leah sa daghang makalingaw nga mga kalihokan. Mitambong siya sa klase sa ballet ug klase sa pagluto. Mitambong usab siya og klase sa pagpanahi uban sa iyang labing suod nga higala, si Ellie.
Kaila na si Ellie ug si Leah sa usag usa sukad sa gagmay pa sila. Nag-eskwela sila sa samang eskwelahan, apan wala pa gayod sila nagkauban sa samang klase. Usahay mobisita si Ellie aron magdula didto sa balay ni Leah. Nakakita si Leah og paresan sa dili tinuod nga anteyohos nga murag pareha sa kang Ellie nga iyang gisul-ob. Nakapakatawa kana ni Ellie.
“Dili ko katuo nga hapit na mahuman ang ting-init,” miingon si Ellie. “Ganahan unta ko nga mas magkita pa kita.”
Mipahiyom si Leah. “Ako sab.”
Hapit na gayod magsugod ang laing tuig ting-eskwela. Mahinamon si Leah alang sa grade four, apan gikulbaan usab siya og gamay. Kasagaran okey ra siya nga mag-inusara lang siya. Apan ang usa ka tuig taas nga panahon nga walay higala diha sa iyang klase. Nakahinumdom siya kon unsa ang iyang gibati sa dihang mihunong si Anna sa pagpakighigala niya. Dili siya gusto nga mobati nga nag-inusara.
Nagsige og ampo si Leah sa Langitnong Amahan alang sa kalinaw. Sa dihang natapos ang ting-init, mibati siya nga malaomon. Nasayod siya nga ang mga butang ma-OK ra.
Sa unang adlaw sa pag-eskwela, milakaw pasulod si Leah ngadto sa iyang bag-o nga lawak klasehanan.
“Leah!”
Dili siya makatuo. Anaa si Ellie sa iyang klase!
Midagan si Ellie paingon kang Leah ug gigakos siya. “Malipayon kaayo ko nga ania ka dinhi! Kini gayod ang mahimong labing nindot nga tuig!”
Mipahiyom og dako si Leah. Nasayod siya nga ang Langitnong Amahan nag-uban kaniya, bisan kon kini lisod. Ug husto si Ellie—kini nga tuig mao gayod ang mahimong labing nindot sukad!
Mga paghulagway pinaagi ni Alyssa Tallent