O Le Tusi Fiafia
“O nisi taimi e oo lava i faiaoga e popole,” o le tala lea a Tama.
“Susu maia i le vasega, tagata uma.”
Sa tilotilo a’e Riley i lona faiaoga fou ma ataata. Sa foliga laitiiti o ia nai lo isi ona faiaoga. Na tete lona leo a o ia tautala. Sa ia kilia lona faai ma faaauau.
“O au o Mr. Berrett.”
Sa sii le lima o se tamaitiiti aoga. “E fou mai oe?” o lana fesili lea.
“Ioe. Faatoa ou faauu mai le kolisi. O outou o la’u vasega muamua lava.”
Ona faamalamalama mai lea e Mr. Berrett le mea o le a aoaoina e le vasega. Sa tautala lemu o ia. O nisi taimi sa faigata ona lagona atu o ia.
Sa mafai ona faalogo atu Riley i le femusuai o tamaiti i ona tua. O lena mea na atili faigata ai ona lagona le mea na fai mai ai Mr. Berrett. Ae sa faia e Riley le mea sili na te mafaia e faalogo ai. Ina ua tilotilo atu Mr. Berrett ia te ia, sa ataata o ia.
I le taumafataga o le afiafi i lena po, sa fesili ai Tina e uiga i le aso muamua o Riley i le aoga.
“Ou te fiafia i la’u vasega ma o’u faiaoga,” o le tala lea a Riley. “E i ai se matou faiaoga toatasi e fou. Sa tau popole o ia. Sa taufaalili nisi o tamaiti ia te ia.”
“O nisi taimi e oo lava i faiaoga e popole,” o le tala lea a Tama.
Na ataata Tina. “Ua ou fiafia ua e i ai iina e faafiafia o ia.”
O le aso na sosoo ai, na faalogo ai Riley i nisi o tamaiti o talanoa i le faletele.
“Ou te vasega foi ia Mr Berrett,” o le tala lea a se tasi o i latou. “Sa le mafai foi ona ou lagona o ia ananafi.”
“Na e faalogoina le tete o lona leo?”
“O le a umi le tausaga,” o le tala lea a se isi tamaitiiti. Sa latou talie uma.
Sa mafaufau Riley i le mea na fai mai ai Tama e uiga i faiaoga e popole foi. O ananafi o le aso aoga muamua lea a Mr. Berrett. Atonu sa fai si taufaafefe. Sa fai atu tina e faafiafia o ia. E mafai faapefea ona faia e Riley lena mea?
Ina ua fai e Riley lana tatalo i lena po, sa ia ole atu i le Tama Faalelagi e ta’u atu ia te ia pe faapefea ona fesoasoani ia Mr. Berrett.
O le aso na sosoo ai, na tatala ai e Riley lana meaai o le aoauli. O totonu sa i ai se tusi mai ia Tina. “E maoae oe!” na fai mai ai. Sa ataata Riley. Sa fiafia o ia i tusi a Tina. Sa ta’ua e lona aiga i latou o “tusi fiafia.”
O lena la! E mafai e Riley ma lana vasega ona tusi se faamatalaga fiafia mo Mr. Berrett!
Sa valaaulia e Riley nisi o lana vasega e feiloai i lona fale pe a tuua le aoga. Sa latou teuteuina se pepa lautele sesega lapoa, o i ai ni foliga ataata ma fetu. Sa latou tusia ni mea sa latou fiafia i ai e uiga ia Mr. Berrett. Sa latou tusia mea ua uma ona latou aoaoina mai ia te ia. Ma sa latou fai atu ia te ia ua latou fiafia i le avea o ia ma o latou faiaoga.
O le aso na sosoo ai, na vave taunuu ai Riley ma ni nai ana uo i le aoga. Sa latou tautau le pepa lautele o i ai se savali i le faitotoa o le potuaoga o Mr. Berrett. Ona latou lalafi lea i le tulimanu e matamata i le mea na tupu.
E lei umi ae oo atu Mr. Berrett i lona potuaoga. “Oi!” o lana tala lea. Sa vaavaai atu Riley ma tamaiti aoga ia te ia o faitau a latou faamatalaga tusitusia. Sa sosolo ifo se ataata lapoa i ona foliga.
Ina ua vaai atu Riley i lona fiafia tele, sa ia lagonaina foi le fiafia. Sa ataata o ia ma avatu se pati lima i ana uo.
A o latou savavali ese atu, sa faalogo atu Riley i se tasi o fai mai, “E le mafai ona ou faatali e alu i le vasega a Mr. Berrett i le aso!” Sa le mafai foi ona faatali Riley.
Ata na tusia e Kübra Teber