Tusia e Oe

O Le Filifiliga o le Soka

Issac E., 9 tausaga, Yucatán, Mekisiko

Sa ou fiafia e taalo soka i la’u au a le aoga. Ae sa le mafai ona ou alu i le tele o taaloga ona sa faia i le Aso Sa. Ou te manao ia tausia le Aso Sapati ia paia.

I se tasi aso na fesili mai ai lo’u faiaoga pe aisea ou te le sau ai i taaloga i Aso Sa. Na ou faapea atu o a’u o se tagata O Le Ekalesia a Iesu Keriso o le Au Paia o Aso e Gata Ai. Sa ou fai atu ia te ia o le Aso Sa o se aso faapitoa mo a’u. E na o le pau le mea ou te faia o mea e fesoasoani ou te manatua ai Iesu Keriso ma latalata atili atu ai ia te Ia. Mulimuli ane sa fai mai le faiaoga sa i ai se taaloga i le Aso Sa na sosoo ai. Sa ou fai atu ia te ia o le a ou le i ai i le taaloga. Sa fai mai le faiaoga e le afaina lena mea ma aua le popole.

I ni nai minute mulimuli ane, sa talosaga atu ai le faiaoga mo le gauai mai o tagata uma. Ua suia le taaloga i le Aso Toonai! Sa ou lagonaina le fiafia tele.

Ina ua uma le aoga taaloga, sa sau se tamaitiiti ma fai mai, “Faafetai tele lava!” Sa ou fesili atu ia te ia pe aisea na ia faafetai mai ai ia te a’u. Sa ia fai mai, “Ou te alu foi i la’u lotu i Aso Sa. Ou te faafetai ona sa e ta’u atu i le faiaoga e uiga i ou talitonuga. Semanu ou te le alu foi i le taaloga.” Ina ua mavae lena aso, sa avea i ma’ua ma lena tamaitiiti ma ni uo lelei tele.

Mai lenei aafiaga sa ou maua ai se uo fou ma le avanoa e alu ai i le taaloga. O le tausaga na sosoo ai, na avea ai a’u ma kapeteni o le au soka a la’u aoga. Ae o le mea sili na ou aoaoina o le faamaoni i taimi uma i le Alii. Afai ou te faamaoni ia Iesu Keriso, o le a Ia faamanuiaina a’u i taimi uma.

Ata na tusia e Josh Talbot