O Le Mesi o Fuamoa
O le isi fuamoa na taavale ese mai le laulau. Pisi!
Sa faataamilo Sasha i lona sakete lanu piniki sesega. O lona ofu e sili ona fiafia e ofu i le lotu. Ma o lenei ua oo i le taimi mo lana vaega e sili ona fiafia i ai i le lotu. Peraimeri!
Sa fesoasoani le faiaoga a Sasha ia i latou e aoao Mataupu Faavae o le Faatuatua. O le asō sa latou aoaoina ai le numera 13. Sa umi! Ae na fai mai Sister Banda, “Ou te iloa e mafai ona outou aoaoina le vaega muamua. ‘Matou te talitonu ia faamaoni.’ Fai faatasi ma a’u!”
“Matou te talitonu i le faamaoni,” o le tala lea a Sasha ma isi tamaiti.
Mulimuli ane i lena vaiaso, sa taaalo ai Sasha ma lona tuagane laitiiti, o Alfred, i le umukuka. “Ua ou le fiafia,” o le tala lea a Alfred.
“Ma a’u foi.” Ona vaaia lea e Sasha ni fuamoa i luga o le laulau. Sa foliga manaia e taalo ai. “Ei, e i ai so’u manatu. Ta taaalo i se taaloga!”
Sa piki i luga e Sasha se fuamoa. “E te tu i le isi itu o le laulau,” sa ia fai atu ai ia Alfred. Ona ia faataavale atu lea o le fuamoa ia te ia. Sa talie Sasha ma Alfred. Sa matua galulu le fuamoa!
“O oe!” Na fai atu ai Sasha.
Sa toe faataavale atu e Alfred le fuamoa ia te ia. Ae o le taimi lea sa lei sao le taavale a le fuamoa. Nai lo lena, sa pi’o ma taavale ese loa lava mai le laulau. Pisi! Sa pa’u le fuamoa i le fola, ma faia ai se mesi piipii.
Sa tilotilo atu Alfred ia Sasha ma ni mata tetele. Ona la talie leotele lea. “Ta toe faia!” o lana tala lea.
Sa uu mai e Sasha se isi fuamoa. “Pu’e a o lei taavale ese!” o lana tala lea. Sa sili atu ona malosi lona faataavaleina o le fuamoa nai lo le muamua. Sa misi e Alfred. Pisi!
Sa toe uu mai e Alfred nisi fuamoa se lua. Sa ia faatelevave le faataavalega o i laua. Sa le mafai e Sasha ona taofia vave i laua. Pisi! Pisi! Sa faateteleina le talie o Sasha ma Alfred.
Ona faalogoina lea e Sasha le sau Tina. Auoi, leai! O le a oo i laua i se faafitauli tele!
Sa lei manao Sasha ia tina e ita ia i laua. Atonu e mafai ona laua faatupu se tala. E mafai ona ia ta’u atu ia Tina la te lei faia.
Ae na manatua e Sasha le mataupu faavae o le faatuatua lona sefulutolu. “Matou te talitonu ia faamaoni.”
“O le a le mea ua tupu?” O le fesili lea a Tina. Sa ia sioa atu i le mesi i luga ole fola. “O ai na taeia fuamoa?”
Sa manavanava loloa Sasha. “Ou te faamalie atu, Tina. O a’u ma Alfred. Sa maua manatu sa foliga malie fuamoa e taaalo ai. Ae sa le o se manatu lelei. O le a ou fesoasoani e faamama.”
“E faapena foi a’u,” o le tala lea a Alfred.
Sa fusi e Tina ia Sasha ma Alfred. “Faafetai mo le ta’uina mai ia te a’u o le mea moni.”
Sa ataata Sasha. Ona ia liliu atu lea ia Alfred. “Atonu e mafai ona tatou faia se taaloga fou—e uiga i le faamamaina!”
Ata na tusia e Valentina Belloni