“Gol blong Rid,” Fren, Jenuware. 2024, 36–37.
Gol blong Rid
Anders i no laekem blong rid laod.
Stori ia i hapen YSA.
Anders i lisin long sista blong hem i stap rid long taem blong famli skripja stadi. Hem i traem blong folem long tablet blong hem. Be hem i had blong lukluk nomo long ol toktok.
Oltaem Anders i stap gat had taem blong rid. Las yia, hem i faenemaot se hem i gat disleksia. Disleksia hem i wan disabiliti blong lanem samting we i mekem i had blong rid. Bren blong hem i stap miksimap ol toktok mo ol leta, mo ol ae blong hem i stap go long nara pej taem hem i traem blong rid.
Sista blong hem i finis blong ridim ves blong hem, mo brata blong hem i ridim nekis ves. Be Anders i no rid. Hem i no laekem blong rid laod. Taem hem i mekem ol toktok long tablet blong hem i bigwan, i helpem hem smol. Be hem i no laekem nating we riding blong hem i slo mo i no nomol. !Hem i mekem plante mistek! Hem i mas wok had from wan samting we i luk isi blong ol narawan oli mekem.
Taem oli rid finis, famli blong Anders i wajem wan vidio. Hem i abaot program blong Ol Pikinini mo Ol Yut.
“Putum ol gol blong yuwan we bae i jalenjem yu mo traem yu,” Elda Gong i talem long vidio. “Faenem ol niu talen, intres, mo skil.”*
Anders i tingting abaot ol gol we bae hem i putum. Ating hem i save lanem olsem wanem blong bekem ol kuki. O !pleiplei futbol gud moa!
Afta hem i luk Buk blong Momon long tebol. I no saon olsem wan gud taem tumas blong traem rid moa gud. Be hem i wantem blong save ridim skripja wetem famli blong hem.
“Mi save se bae gol blong mi hem i wanem,” hem i talem long Papa.
“?Wanem ia?” Papa i askem.
Anders i pikimap Buk blong Momon. “Mi wantem blong ridim wan ves blong Buk blong Momon laod evri dei.”
“Hemia i wan gudfala gol tumas,” Papa i talem. “?Yu wantem stat wetaem?”
“!Naoia!”
Anders i go long rum blong hem mo sarem doa. Hem i no wantem eni wan blong harem hem. Afta hem i openem Buk blong Momon blong hem. Hem i miksimap sam long ol toktok, be i tekem hem wan minit nomo blong finisim fas ves. Hemia i no nogud tumas, hem i tingting.
Anders i ridim wan skripja evri dei. !Hem i had! Hem i no filim tu se hem i stap kam moa gud. Be hem i gohed blong wok long hem.
Afta wan dei long skul, tija blong hem i se, “!Wao! Mi no save bilivim se yu stap lanem samting hariap olsem.”
Anders i lukluk i kam antap long homwok blong hem. “?Tru?”
Tija blong hem i sakem hed blong agri. “Yu stap kam antap fulap.”
Anders i lukluk daon long ol toktok long pepa blong hem. Hem i isi fulap moa naoia blong ridim olgeta bitim bifo. Gol blong hem blong praktis blong stap ridim ol skripja, i stap helpem hem blong lanem samting long skul.
Taem hem i kam long haos, hem i ron i go antap blong ridim ol skripja blong hem. Taem hem i lukluk pej, ol toktok oli gohed yet blong stap muvmuv raon. Be hem i moa isi long hem blong luksave wanem oli stap talem.
Anders i glad tumas from famli skripja stadi long naet ia.
“Ei, Papa,” hem i talem. “?Mi save help blong rid tedei?”
Papa i smael. “!Bae mi laekem hemia!”
Anders i folem gud taem ol brata mo sista oli ridim wanwan ves. Taem hem i taem blong hem, hem i ridim ves slo blong mekem sua se hem i ridim evri toktok i stret. Afta we hem i finis blong rid, hem i lukluk antap. Evriwan i stap smael long hem.
Nomata we hem i no wan man blong rid we i stret evriwan, Anders i filim glad tumas long hemwan. Hem i save se taem hem i wok had, Papa long Heven oltaem bae i stap blong helpem hem.
Ol pikja droing i kam long Kelly Smith