“Wan Smol Storian wetem Eilish abaot Tabu Spirit,” Fren, Jenuware. 2024, 40–41.
Wan Smol Storian wetem Eilish abaot Tabu Spirit
Eilish i wan gel we i gat 12 yia, we i stap laef long Is Eria blong Singapore. Mifala i askem hem abaot olsem wanem Tabu Spirit i stap helpem hem.
Talem long mifala abaot yuwan.
Mi laekem tumas blong rid mo pleplei volibol, mo fevret sabjek blong mi long skul hem i matematik. Fevret kaekae blong mi hem i lasania, mo fevret kala blong mi hem i red. Taem mi groap, mi hop blong kam wan loya mo wok long kot.
?Tabu Spirit i filim olsem wanem long yu?
Blong mi, Tabu Spirit i olsem blong stap gat wan fren we i kolosap long mi. Mi filim olsem Hem i wan man we mi save dipen long hem taem mi kipim ol komanmen mo ol kavenan blong mi wetem Papa long Heven. Mi tingting long Hem olsem fren blong mi we i stap lidim mi. Hem i save helpem mi blong mekem ol gudfala joes.
?Wanem advaes nao bae yu wantem blong givim long wan we i no sua se oli hem i bin filim Tabu Spirit o no?
Samtaem mi tu mi filim se mi no sua sapos mi stap filim Tabu Spirit o no? Be sapos yu tingting gud long hem, ridim olgeta skripja, mo prea, mo filim gud long hem, hemia i Tabu Spirit. Samtaem blong stap lisin long Tabu Spirit i no wan filing nomo. Hem i save wan tingting o aedia tu. Sapos yu filim se yu konfius yet, oltaem yu save prea mo askem Lod bakegen blong i help.
?Wetaem nao yu bin filim Tabu Spirit?
Las yia, mi bin plei long wan kompetisen blong volibol. Olsem fulap long ol fren long tim blong mi, mi bin fraet. Taem mi stat blong plei, tim blong mifala i bin lusum tufala fas gem finis. Tingting blong mifala i foldaon plante. Afta ol pipol we oli stap wajem gem oli talem sam toktok we i no kaen, mo mifala i filim moa nogud. Mifala i bin lus.
?Taem mama blong mi i askem mi abaot gem, mi stat blong krae. Mi bin filim nogud tumas. Mi go long rum blong mi we i naes mo kwaet, mo mi mekem wan prea. Afta we mi prea, mi filim moa kwaet mo moa pis long hat blong mi. Mi save se Tabu Spirit i bin kamfotem mi mo we oltaem bae Hem i stap blong helpem mi. Mi save se bae Hem i stap wetem mi taem mi plei long narafala kompetisen we i stap kam yet long yia ia.
?Wanem nara wei moa we Tabu Spirit i bin helpem yu?
Tabu Spirit i bin helpem mi tu taem mi muv long Praemeri i go long Ol Yang Woman. Mi bin glad tumas blong muv i go long Ol Yang Woman. Be mi filim se mi fraet smol long semmak taem ia. Mi harem nogud smol blong lego Praemeri tu.
Bifo long klas blong mi, mi talem wan prea mo askem Papa long Heven blong helpem mi blong enjoem Yang Woman. Mi filim pis long hat blong mi taem mi wokbaot i go insaed long niu klasrum blong mi. Mi bin rere blong lanem samting. !I bin help blong tingbaot se !Tabu Spirit bae i oltaem stap blong mi!
Ol pikja oli kam long Annabel Tempest