“Ol Skripja blong Sami,” Fren, Jenuware 2024, 10–11.

Ol Skripja blong Sami

I Kam long Carolina Maldonado

(I kamaot long wan tru stori)

Sami i wantem blong rid tu.

Stori ia i hapen long Bolivia.

Papi i klapem han blong hem long en blong famli haos naet. “Mi gat wan aedia blong wan famli gol,” hem i talem. “Bae yumi ridim Buk blong Momon tugeta evri dei.”

Ol bigfala brata blong Sami, Andrés mo Juan, oli sakem hed blong agri wetem ol bigfala smael from aedia ia.

“!OKEI!” Andrés i talem.

Sami i glad tu. Be afta hem i tingbaot wan samting. Hem i leftemap han blong hem. “Mi no save olsem wanem blong rid. ?Bae mi help olsem wanem?”

Juan i muvum ol solda blong hem se i no save. “Yu save lisin nomo.”

Ol brata blong Sami oli save olsem wanem blong rid finis. Be Sami i gat faef yia nomo. Hem i no lanem blong rid yet.

“!Be mi wantem help tu!” Sami i talem wetem wan fes we i no hapi.

Mama i haggem Sami. “Mo bae yu help,” hem i talem. “Oltaem i gat wan rod blong mekem wanem we God i askem yumi blong mekem.”

Long nekis naet, famli blong Sami i kam tugeta blong ridim Buk blong Momon. Olgeta evriwan oli karem ol skripja blong olgetawan, be Sami nomo i nogat. Mama i givim wan pikja buk blong Ol Stori blong Buk blong Momon long hem.

“Yu no save ridim ol toktok yet. Be yu save ridim ol pikja,” Mama i talem wetem wan smael.

Sami i holemtaet buk ia. !Naoia hem i save rid wetem famli blong hem tu!

Olgeta evriwan oli gat janis blong rid. Sami i lukluk ol pikja we i soem stori. Taem hem i taem blong hem, hem i talem long ol narawan, wanem hem i luk insaed long ol pikja. Hem i talem fulap smosmol samting olsem we hem i save mekem.

Taem ol dei i stap go, Sami i wantem blong rid tumas. Mama i tijim hem ol saon we wanwan leta i mekem. Afta Mama i soem long hem olsem wanem blong mekem ol saon blong ol toktok. Sam manis afta, Sami i no nidim pikja buk tumas. Be, hem i ridim las toktok blong evri ves we famli blong hem i ridim. Mama i ridim toktok faswan, mo Sami i talem bakegen.

Fastaem, oli rid slo. I tekem longfala taem blong kasem en blong wanwan japta. Andrés mo Juan i komplen taem hem i taem blong Sami blong rid. Be oli gohed blong rid olsem wan famli.

Smosmol, Sami i rid moa. Hem i ridim wan toktok blong wan ves, afta tu toktok, afta tri. !Afta hem i stat blong ridim ful ves!

Kolosap long en blong gol blong olgeta, Sami i save ridim sam ves hemwan. Riding blong hem i bin kam moa gud. Lav blong hem long Buk blong Momon i bin gro tu.

Long en, famli blong Sami i finis blong ridim Buk blong Momon. !I bin tekem tu yia! Naoia, Sami i gat seven yia, mo hem i bin lanem blong rid gud.

“!Kongratulesen!” Papa i talem. “!Yumi winim!”

Sami i glad wetem famli blong hem. !Hem i bin helpem olgeta blong finisim Buk blong Momon!

Juan i givim wan bigfala hag long Sami. “?Wanem bae i gol blong yu blong ol nekis tu yia?”

Sami i smael. Hem i stanap stret mo talem, “!Bae mi ridim Buk blong Momon bakegen!”