“Wanem Nao I Stap long Maen blong Yu?” Fren, Jenuware 2024, 42.

?Wanem Nao I Stap long Maen blong Yu?

Taem mi putum ol gol, mi stap fogetem olgeta long en. ?Olsem wanem mi save kasem ol gol blong mi?

—Stap Kasem long Reykjavík

Dia Fasin blong Sta Kasem,

No wari: Yu no yuwan taem i kam long taem blong stap putum mo fogetem ol gol. Hemia i wan samting we plante pipol oli stap gat hadtaem wetem. Yumi evriwan i gud blong stap mekem ol gol. Be blong kasem ol gol ia—hemia nao i pat we i had. !Hemia sam aedia blong help!

Wetem lav,

Fren

Drim bigwan be stat smol. Hem i gud tumas blong jalenjem yuwan. Be tingbaot se ol smosmol gol oli gat bigfala paoa tu. “Tru long ol smol mo ol samting we i no strong, ol bigfala samting i kam blong hapen” (Alma 37:6).
Yu mas spesifik. “Bae mi help long hom.” Gol ia hem i oraet nomo, be hem i no klia tumas. “Bae mi help long hom taem mi putum gud ol ting blong mi evri dei.” Hemia i wan gudfala gol. Hem i spesifik. Hem i wan plan.
Serem gol blong yu. Tokbaot gol blong yu wetem papa o mama, tija, o fren. Askem olgeta blong sapotem yu. Samtaem taem i gat wan blong stap jekem yu mo pusum yu blong gohed, hemia i stret samting we yu nidim blong i pusum yu moa.
Mekem ol rimaenda. Sapos yu wantem blong tingbaot ol gol blong yu, raetem daon. Putum wan kopi blong ol gol blong yu long wan ples we bae yu luk evri dei. !Mekem i gat fulap kala mo tingting long ol defren kaen tingting!
Gat fet. “Yumi mas gat fet long God,” Presiden M. Russell Ballard i talem. “Yumi mas gat fet long Lod Jisas Kraes. Mo o, i impoten tumas blong yumi mas gat fet long yumiwan.”^* !Yu save mekem! God bae i help.