“Ol Aktiviti blong Kam Folem Mi ,” Fren, Jenuware 2024, 28–29.
Ol Aktiviti blong Kam Folem Mi
Blong famli haos naet o skripja stadi—o blong gat wan gud taem nomo!
1–7Jenuware
Testemoni blong yu
Ol pikja droing oli kam long Katy Dockrill
Blong Ol Fas Pej blong Buk blong Momon
Fastaem oli raetem Buk blong Momon long ol gol plet. Ol pipol we oli bin luk ol plet ia oli raetem se oli save se hem i tru (luk long Testemoni blong Ol Tri Witnes mo Testemoni blong Ol Eit Witnes). Raetem o droem testemoni blong yuwan abaot Buk blong Momon mo putum insaed long ol skripja blong yu.
8–14 Jenuware
Stap Serem Tresa
Blong 1 Nifae 1–5
Ol skripja oli ol bigbigfala tresa (luk long 1 Nifae 5:21). Droem sam sep blong ol saen ston long wan pepa mo katemaot. Askem wanwan man blong raetem wan skripja blong Buk blong Momon long ol saen ston ia. Miksimap ol saen ston ia mo wanwan i gat janis blong jusum wan mo ridim wanwan skripja.
15–21 Jenuware
Ol Klin mo Tabu Plet
Blong 1 Nifae 6–10
Lod i bin talem long Nifae blong mekem wan nara set blong plet blong wan spesel mo waes stamba tingting (luk long 1 Nifae 9). Mekem ol set blong plet blong yuwan aot long ol pepa mo pisis blong katen we oli foldem. (!Yu save kavremap pepa o katen blong yu wetem aluminom foel!) Raetem o droem wanem we yu lanem aot long Buk blong Momon long ol plet blong yu.
22–28 Jenuware
Lav blong God
Blong 1 Nifae 11–15
Ridim skripja stori abaot drim blong Lihae long pej 26. Naoia, droem wan tri. Mekem wanwan memba blong famli, i putum wan lif long tri mo talem wan samting we Papa long Heven i bin givim long yumi we i soem se Hem i lavem yumi.