Jisōs Kraist Emour

Jān Būreejtōn Henry B. Eyring

Rikakpilōklōk eo Kein Karuo ilo Būreejtonji eo Kein Kajuon

Kar ukukōte jān “Jetōb eo An en pād Ippem,” Liaona, Māe 2018, 86–89; and “He Is Risen,” Liahona, Epr. 2013, 4–5.

Tōre in ilo iiō in ejipan̄ kōj keememej en̄taan eo an Rilo̧mo̧o̧r eo im kōn An kar jerkakpeje jān lōb eo.

Juon iien ikar jutak ippān lio pāleō inam̧ōj in juon lōb ilo Jerusalem. Ilowaan, kōm kar lo juon jea dekā ņae juon kiin em̧.

Bōtaab bar juon pija ekar itok n̄an ļōmņak eo aō. Ikar ļōmņak kōn Meri ilo lōb eo ejjeļo̧k kobban. Liin ekar jan̄ kōnke Rilo̧mo̧o̧r eo ekar mej. Liin ekar jab jeļā ia eo ānbwin eo An ekar pād ie.

Innām “ej oktaklik im lo Jisōs e jutak, im e jaje e Jisōs” (Jon 20:14). Mary ekar ļōmņak E ekar juon rikallib.

“Jisōs e ba n̄an e, Meri” (Jon 20:16). Kiiō Meri ekar kile E. Liin ekar jeļā E ekar jerkakpeje.

Kōnke Jisōs Kraist ekar anjo̧ ioon mej, aolep ajri ro nejin Jemedwōj Ilan̄ renaaj jerkakpeje ilo juon ānbwin me ejjamin naaj mej.

Ij kam̧m̧oolol Jemedwōj Ilan̄ kōn menin letok eo an Nejin Ejitōnbōro. Ij kam̧m̧oolol n̄an jeļā bwe E ekar pinmuur kōn jeraiwiw ko ad im kar jerkak ilo Jerkakpeje eo. Ij kam̧ool bwe Jisōs ej Kraist eo ekar jerkak, ad Rilo̧mo̧o̧r, im ad waanjon̄ak eweppān.

Will (Wheel) in Bwebwento in Ijtō

M̧wijitļo̧k doulul (circle) ko im likūt doulul eo m̧oktata ioon eo juon. Dāil juon ron̄ ilo ioļapļap in im jibwi ilo jikier kōn juon pin ak kiria māāl. Innām kōro̧o̧l doulul eo itulōn̄ n̄an ba kōn bwebwenato in Ijtō eo.

Bwebwenato in Ijtō eo

Jisōs ekar itok n̄an Jerusalem ilo Palm Sunday eo (lale Mark 11:7–11).
Jisōs ekar leļo̧k n̄an rikaļoor ro An kwojkwoj eo (lale Matu 26:26–28).
Jisōs ekar jar ilo Jikin Kallib Gethsemane (lale Mark 14:32–36).
Jisōs ekar mej kōn kōj ioon debwāāl eo (lale Luk 23:46).
Āinbwinin kar kōbabuik ilowaan juon lōb ium̧win jilu raan ko (lale Matu 27:59–64).
Jisōs ekar bar mour. Im E ej mour rainin. (Lale Matu 28:6–9.)