“Janeelyn ej Bōjrak Jikrooļ (Scrolling),” Jera, M̧aaj 2024, 36–37.
Janeelyn ej Bōjrak Jikrooļ (Scrolling)
Liin ekar lukkuun kōņaan lo paat eo juon in juon pija in alooj. Im eo tok juon. Im eo tok juon.
Bwebwenato in ekar bōk jikin ilo Malaysia.
Janeelyn ekar iir addi lep in pein ilo mejān talboon eo. Pija in alooj ko eiur aer waļo̧k im jako. Liin ekar bōjrak n̄an alooje juon, innām bar jikrooļ (scroll) Innām liin ekar bōjrak ilo bar juon pija in alooj. Ekar kanooj lōn̄ kajin ko renana, bōtaab ekar kōjak, kōn menin liin ekar alooj wōt. Innām bar jikrooļ (scroll).
“Janeelyn! Kwokōņaan ke itok im jin̄a?” Leddik eo jatin Jojo ekar kōjaaļaļ juon m̧ōttan peba.
Janeelyn ekar kōjjaad lōn̄tak. “Ejjab kiiō”
“Em̧m̧an.” Jojo ekar kilen kōraat im door laļļo̧k peba eo.
Jikrooļ (scroll). Jikrooļ (scroll). Jikrooļ (scroll). Pija in alooj in mennin mour ko. Pija in alooj in armej ro rebun̄bun̄. Pija in alooj in ajri ro rej eeb. Im jejjo pija in alooj ko Janeelyn ekar jeļā ke ejjab em̧m̧an n̄an alooji. Aaet, bōlen elōn̄ļo̧k jān jejjo. Janeelyn ekar jino en̄jake ke ekar aikuj in bōjrak an alooji.
Bōtaab armej ro rej barāinwōt likūt elōn̄ men ko rem̧m̧an, liin ekar ļōmņak. Em̧ool liin ekar katak wāween ko rekāāl n̄an jin̄a jān jejjo pija in alooj ko.
“Janeelyn,” M̧am̧a ekar ikkūr.
“Hmm?” Janeelyn ekar jab reilo̧k ilo iien in.
“Jej m̧ōn̄ā burae raij in m̧ōn̄ā in lo̧jet joten in,” M̧am̧a ekar ba. “Komaron̄ ke jipan̄ eō kōm̧m̧ane?”
Janeelyn ekar iakwe burae raij in m̧ōn̄ā in lo̧jet. Bōtaab liin ekar jab kōņaan jerkak kiiō.
“Imaron̄ ke karōk tebōļ eo wōt?” liin ekar kajjitōk. “Imaron̄ jipan̄ kōn kōnno̧ ko ālkin barāinwōt.”
“Em̧m̧an,” M̧am̧a eaar ba. “Bōtaab ej aikuj jetjet am̧ kōpooje n̄e ij kajjitōkin eok. Innām ej iien n̄an bar kōro̧o̧lļo̧k talboon eo. Kwoj errā?”
“Ij errā,” Janeelyn ekar ba.
Janeelyn ekab de waanmaanļo̧k wōt n̄an alooji pija in alooj ko. Bar juon alen, liin ekar en̄jake bwe ekar jab aikuji in lali. Bōtaab liin ekar lukkuun kōņaan lo pija in alooj eo tok juon. Im eo tok juon. Im eo tok juon. Jikrooļ (scroll). Jikrooļ (scroll). Ekar pen nānbōjrak!
Ilo jem̧ļo̧kin Janeelyn ekar door laļļo̧k talboon eo. Ekwe, bōlen liin emaron̄ kar kōjem̧ļo̧k pija in alooj eo āliktata . . . .
Jaab, Janeelyn ekar dim an jiron̄ e make. Jetōb Kwojarjar eo ekar im̧we liin, im liin ekar kōņaan ron̄jake. Pein liin ekab de kar pād ilo mejatoto turin talboon eo. Ekar kanooj in kapopo! Janeelyn ekar kiil mejān.
Jema Ilan̄ Jitōnbōro, liin ekar jar ilo ejjeļo̧k ainikien. Ij buuļ kajjieon̄ ron̄jake Jetōb Kwojarjar, bōtaab ij aikuj jipan̄. Ikōņaan bōjrak jān alooji pija in alooj kein, bōtaab ij m̧ool ijjab jeļā kilen. Ilo etan Jisōs Kraist, amen.
Ak ilo iien eo, M̧am̧a ekar kūr liin n̄an karōk tebōļ eo. Janeelyn ekar m̧ōkaj an jutak im kar ettōn̄ dikdik. Ekar juon wāween n̄an jipan̄ kōm̧ad liin jān talboon eo.
Janeelyn ekar karōk piliej ko ioon tebōļ eo. “M̧am̧a, ikar lo jet men ko renana ilo talboon eo,” ekar ba ilo an jab ļōmņak.
M̧am̧a ekar reilo̧k jān an kōmat. “Kain rōt men ko?”
“Ko āinwōt, naan ko renana im pija in alooj ko renana.” Janeelyn ekar lelōn̄ļo̧k aeran. “Bōtaab ejjab aolep renana.”
“Ta eo kwar kōm̧m̧ane ke kwar lo men ko renana?” M̧am̧a eaar kajjitōk.
Janeelyn ekar ikōn̄ ium̧win jidik iien. Liin ekar likūt juon kab ilo kajjojo jikin ko.
“Ikab de alooj wōt,” liin ekar ba. “Ijjab jeļā etke. Bōtaab Jetōb Kwojarjar eo ekar jiron̄ eō n̄an bōjrak, kōn menin ikar ba juon jar kōn jipan̄.”
M̧am̧a ej likūt juon būļātōr in fried rice in m̧ōn̄ā in lo̧jet ioon tebōļ eo. “Jet iien elukkuun pen bōjrak kōm̧m̧ani men ko jekdo̧o̧n n̄e jejeļā bwe re nana,” liin ekar ba. “Im n̄e men kein rej waļo̧k, men eo em̧m̧an tata jemaron̄ kōm̧m̧ane ej jar.”
Janeelyn ekar ettōn jidik. “Kōn menin ikar kōm̧m̧ane ta eo ejim̧we.”
“Aaet kwar.” M̧am̧a ekar leļo̧k n̄an Janeelyn jibuun ko n̄an doori ioon tebōļ eo. “Im intōrnet ekar jab nana ļo̧k n̄an jidik. Emaron̄ jipan̄ kōj ekkejel ippān ro m̧ōttad im kwaļo̧k ļōmņak ko. Bōtaab emaron̄ in pen n̄an pād ettoļo̧k jān aolep men ko renana barāinwōt. Jān kiiō m̧aanļo̧k, eļan̄n̄e kwonaaj alooji pija in alooj ko, jen alooji ippān doon. Ilo wāween in Baba im n̄a maron̄ jipan̄ eļan̄n̄e kwoj lo juon men enana.”
Janeelyn ekar em̧ajidjid. Iien eo tok juon liin ekar alooji pija in alooj ko ippān Mama im Baba. Bōtaab m̧ae iien eo, ekar kanooj lōn̄ men ko rekalimomo liin emaron̄ kar kōm̧m̧ani ilo an ejjeļo̧k talboon.
“Kwonaaj ke ba n̄an aolep eiien kōjota?” Jinen eaar kajjitōk.
“Aaet! Im ālkin kōjota eo, inaaj jin̄a ippān Jojo!”
Kōmeļeļe ko jān Mitch Miller