Eļapļo̧k IIen ippān Max

Jān Ashlyn B., iiō 12, Washington, USA

Juon iien ikar etal n̄an kāām ilo juon beach ippān baam̧le eo aō, jejjo m̧ōtta, im kidu eo nejū, Max. Kōm kar tutu iaar im ikkure aolepān raan eo. Innām kōm kar alooj bojuļae ko ke ekar marok. Ekar juon iien em̧m̧an n̄an kom̧ aolep.

Ke ekar jem̧ļo̧k bojuļae ko, ikar kappukōt Max. Bōtaab ekar jako! Ikar leļn̄o̧n̄ im kar lam̧ōj ke Max ekar jako. Ke dān kōmejaļaļ ekar to̧o̧r laļļo̧k jān meja, kōm aolep kar pukōt e ilo wōjke ko. Ikar en̄jake juon ainikien edik ej jiron̄ eō n̄an jar, kōn menin ikar jar. Bōtaab ikar kanooj in m̧ōjņo, im ikar kor kōn Max.

Kōm kar jab lo e, kōn menin kōm kar etetalļo̧k n̄an em̧ nuknuk ko am. Ilakkar jar wōt ilo bōra, bōtaab ekar jino jako kōjatdikdik ilo n̄a. Ikar jan̄ ippa make m̧ae iien ikiki.

Jejjo awa ko tokālik, ro jinō im jema raar koruj eō. Max ekar jijet ituru! Ro jinō im jema raar ron̄ ainikien kōļa eo an Max etōn̄tōn̄ inam̧ōj in em̧ nuknuk eo im̧ōm. Ikar kanooj keeņ e im ilo jab koļap kar kam̧m̧oolol Anij kōn an uwaaki jar ko aō.

Jilu iiō ko tokālik, Max ekar jorrāān likin im ekar pād ilo eļap metak. Ekar jab maron̄ mour, kōn menin kōm kar aikuj in kōtļo̧ke. Jemed Ilan̄ ekar kaenōm̧m̧an eō im kar letok n̄an eō aenōm̧m̧an. Jetōb Kwojarjar eo ekar kakeememej eō bwe kōm kar nan̄in wōt jidik luuji Max jilu iiō ko remootļo̧k, bōtaab Anij ekar jipan̄ kōj lo e. Ij kam̧m̧oolol bwe E ekar letok n̄an kōm eļapļo̧k iien n̄an iakwe Max.

Ijeļā Anij ej uwaaki jar ko im ej letok kaenōm̧m̧an ilo mālijjon̄ ko. Pinmuur eo an Jisōs Kraist ej n̄an jabdewōt. Ij kanooj kam̧m̧oolol kōn ta eo Jisōs Kraist im Jemed Ilan̄ raar kōm̧m̧ane n̄an baam̧le eo aō im n̄a.