“Lo̧lo̧ eo im Jojo ko,” Jera, M̧aaj 2024, 4–5.
Lo̧lo̧ eo im Jojo ko
“Jisōs Kraist ekar kōnono kōn menin ilo jeje ko rekwojarjar,” Baba ekar ba.
Bwebwenato in ekar bōk jikin ilo USA.
Ļalem jojo ko reiaļļo raar kalimjōk Clara. Peep, peep, peep!
Kajjojo spring baam̧le e an Clara raar wia jojo ko n̄an kōjparoki. Rainin liin ekar jipan̄ jemān bōkļo̧k er n̄an m̧weo n̄an aer mour ippān bao ko jet.
Iaļ eo raar ettōr ie ekar ekkajkaj. Bōtaab Clara ekar jibwe ioon neen bo̧o̧k eo jojo ko rej pād ie bwe en jab m̧akūtkūt. Liin ekar kōmeraik an popore juon iaer kōn m̧aan addi in pein. Ekar kanooj in meeoeo!
Ke Clara im jemen raar tōpar m̧weo, raar etetal laļļo̧k n̄an im̧ōn bao eo ilo tulikin m̧weo. Imōn bao eo ekar juon ajjur edik ijo aolep lo̧lo̧ ko raar mour ie im kar kōm̧m̧ani el ko aer.
“Ewi wōt lo̧lo̧ in jej aikuj likūt jojo ko ippān?” Jemān ekar kajjitōk.
Clara ekar reito reitak. Juon lo̧lo̧ ekar kōm̧akūtļo̧k straw n̄an aeni ippān doon. Straw eo enaaj kar kōm̧m̧ane juon el emeņeņ n̄an jojo ko rekāāl. Bōlen lo̧lo̧ eo enaaj juon mama em̧m̧an.
“En̄in,” Clara ekar ba, jitōn̄ļo̧k lo̧lo̧ eo.
Baba ekar kōkm̧anm̧an an kotak juon jojo jān bo̧o̧k eo im likūti turin lo̧lo̧ eo. Lo̧lo̧ eo ekar kalimjōk jojo eo. Ekar kotak pein, im ejjab to jojo eo ekar jako!
“Ia eo etal n̄an e? Em̧m̧an ke an pād jojo eo?” Clara ekar kajjitōk.
Baba eaar em̧ajidjid. “Lale.”
Jojo eo ekar kalimōmōik bōran nam̧ōj tak ium̧win koļan pein lo̧lo̧ eo.
“Etke lo̧lo̧ eo ekar kōm̧m̧an rōt in?” Clara ekar kajjitōk.
“N̄an kōjparok jojo eo,” Baba ekar ba. “Lo̧lo̧ eo enaaj kōjparoke wōt im kōmāņeņe ium̧we pā ko pein.”
Clara ekar jipan̄ jemān likūt jojo ko jet ippān lo̧lo̧ eo jineer ekāāl. Lo̧lo̧ eo ekar kotak pā ko pein n̄an ain aolepāer epake.
“Jisōs Kraist ekar kōnono kōn menin ilo jeje ko rekwojarjar,” Baba ekar ba.
“M̧ool ke?” Clara ekar kajjitōk. “Ta eo Eaar ba?”
“Inaaj kwaļo̧k n̄an kwe.”
Clara im Jemān raar deļo̧n̄ļo̧k lowaan m̧weo. Baba ekar kwaļo̧ktok jeje ko rekwojarjar. Innām ekar jino an riit.
“Ewi lōn̄ in Aō naaj kakwelo̧ktok kom̧ āinwōt lo̧lo̧ ej kakwelo̧ktok jojo ko nejin ium̧win pein, eļan̄n̄e kom̧ naaj ukeļo̧k im ro̧o̧l tok n̄an Eō kōn aolep tūm̧laļ in būruōmi.”*
Clara ekar ļōmņak kōn kajjojo jojo ko ium̧we koļan pein lo̧lo̧ ko. “Kōn menin Jisōs ej aintok kōj āinwōt lo̧lo̧ eo ej bōktok jojo ko ium̧we pā ko pein?” Clara ekar kajjitōk.
“Ejim̧we,” Jemān ekar ba. “E ej kōjparok wōt kōj, ejja āinwōt an lo̧lo̧ eo kōjparok jojo ko nejin. Bōtaab E ej bōbrae kōj eļapļo̧k jān m̧ōļo. E ejeļā n̄aat eo jej metak ak nan̄inmej ak būrom̧ōj. E ej letok n̄an kōj aenōm̧m̧an im kaenōm̧m̧an. E ej kea kōn kōj.”
Jibbon̄ōn eo tok juon, Clara ekar najdik lo̧lo̧ eo im jojo kāāl ko nejin. Ekar kōm̧man an liin ļōmņak kōn eoon eo jemān ekar riiti. Liin ekar ettōn̄ dikdik ke ekar ļōmņak kōn Jisōs. Liin ekar jeļā E ekar iakwe e im ekar kea kōn e, āinwōt an lo̧lo̧ eo kea kōn jojo ko.
Kōmeļeļe jān Assia leradi