“E Dua na Siganimate me Vakananumi, ” iTokani, Maji 2024, 14–15.
E Dua na Siganimate me Vakananumi
A vakila o Jona na loloma i Jisu ni lagasere tiko.
A yaco na italanoa oqo mai Finiladi.
A dredre o Jonas ni veitau kei ratou na tuakana kina rumu ni gade ena vuku ni lotu vakamatavuvale. Se rawa tiko ga vua me boica na sipi vavi mai na vakayakavi ni Siganimate. Ka se rawa tiko ga ni tovolea na pasha kamica, na nodratou ivakalomavinaka ni Siganimate.
Ni ratou dabe toka vakamalua na matavuvale, a tucake na tuakai Jona ko Tristan.
“Marau ni Siganimate !” A kaya o Tristan. A tekivuna o koya na nodratou lotu vakamatavuvale ena dua na sere kei na masu. Sa qai yaco mai na gauna ni nodratou parokaramu taleitaki ni vakatagi. E ratou a vakarautaka yadua e dua na sere me baleti Jisu Karisito me ratou wasea vata.
A qiria o Tristan na qita, ka qiria vakamaqosa sara. Ka qai tabaka o tacina o Einar na piano. A tosoya kosova na qaqalo ni ligana na vei ki. E ratou a vakatagitaka talega na sere o Na, Ta, kei kei iratou na tacina. E dau taleitaka o Jonas me rogoca na ivakatagi ni nona matavuvale.
Sa qai nona gauna o Jonas. E cegulevu ka tekivu lagasere.
“Ena so na gauna au dau temaki me‘u cakava e dua na digidigi cala, ia au dau tovolea me‘u vakarorogo ni vakasolokakana na domo lailai malumu, ‘Dou veilomani me vaka sa lomani iko o Jisu.’”*
Ni lagasere o Jonas, sa vakasinaiti na yalona ena loloma. E tonawanawa na wai ni matana ena marau. E vaka ni tukuna tiko vei Jona na Yalo Tabu ni lomani koya na Tamada Vakalomalagi kei Jisu.
“Vinaka vakalevu na nomudou wasea na nomudou taledi,” a kaya o Ta. A taura cake e dua na itaba. E vakaraitaki toka kina ni tekiduru tiko ko Jisu Karisito ka masu tikiva toka e dua na vunikau. “O cei e kila na veika e yaco tiko ena iyaloyalo oqo?”
A laveta cake na ligana o Jona. “Qori o Jisu Karisito ni masu tiko mai Kecisimani.”
A deguvacu o Ta. “Io. E vakila ena gauna oya o Koya na noda mosi kei na rarawa kecega. ”
“A gole ki na Were o Kecisemani ni bera ni mate, ” a kaya o Na. “Ni sa mate oti, a bula tale o Koya. Oqo e tiki taucoko ni Nona Veisorovaki. E cakava kece oqo o Jisu baleta ni lomani keda o Koya.”
A vakaraitaka o Na e dua na vidio me baleta na imatai ni Siganimate. Ni sa cava na vidio, e ratou a vagagalu taucoko me rauta ni dua na miniti. E vakila tale o Jonas na loloma ni Tamada Vakalomalagi kei Jisu Karisito.
“E sa gauna beka oqo ni nodatou itaviqaravi?” A taroga o Jonas.
A tucake o Na mai na idabedabe ka gole ki na kovate. “Io! Jona, o rawa ni vukei au?”
E rau kauta mai o Jonas kei Na na ivavakabi, ikoti, kei na dua na ibinibini mekasini ni Lotu. E qai biu yani ena fuloa. Sa qai solia o Na vei iratou na nodratou dui ivolaniveisiga digitaki ni Siganimate. “Me datou cakava na droini kei Jisu Karisito ena nodatou ivolaniveisiga ni Siganimate.”
A dabe o Jonas ena fuloa ka dolava na nona ivolalailai.
A tomika cake o Ta e dua na peni me volavola ena nona ivolaniveisiga. “Tarava na nomu iyaloyalo, e rawa ni o vola na veika o na cakava mo muria kina na Tamada Vakalomalagi kei Jisu me rawa ni o vakataki Rau vakalevu cake.”
A cega o Jonas na draunipepa ni dua na mekasini. A kunea e dua na iyaloyalo kei Jisu Karisito ni matadredredre tu.
A kotiva tani mai o Jonas na iyaloyalo ka vakabira ena lomadonu ni nona tabana ni ivolaniveisiga. A vakasamataka na loloma taucoko a vakila mai vua na iVakabula ena siga oya. A qai vola o koya , “Au na muria na Tamada Vakalomalagi kei Jisu ena noqu vakarorogo vei Ta kei Na ka veivuke ena cakacaka ni veisiga. Au na lomani iratou na taciqu vakalevu.” A taura cake me vakaraitaka vei Na. A wilika na ka a vola ka matadredredre.
Ena nanuma tiko mai o Jona na Siganimate oqo ena dua na gauna balavu. A vakila na loloma i Jisu Karisito ni a lagasere ka vulica na veika e baleti Koya. Ka vakila o koya na loloma i Jisu ena nona saga me vakataki Koya.
Na Tamada Vakalomalagi kei Jisu Karisito e rau lomani Jona vakaidina. Ka lomani Rau tale ga o Jona.
Droini mai vei Steliyana Doneva