“Tuturu ni Vakabauta,” iTokani, Maji 2024, tabana e 30–31.
Tuturu ni Vakabauta
E sotava o Jekope e dua na leqa—e dau via moce tu ga!
Na italanoa qo e a yaco mai Brazil.
“Jekope, o kila na kena isau?” A taroga o Mrs. Lelis.
A dolava na matana o Jekope ka laveta cake na uluna mai na desi. Era vakaraici koya kece tu na nona lewe ni kalasi. E vakaraici koya tale tikoga yani o nona qasenivuli. A vakila ni sa raragi mai na baluna. Sa baci moce lutu tale ena kalasi!
“Vosoti au, Mrs. “Lelis,” a kaya. “E rawa beka nio tukuna tale na taro?”
Io. Ia yalovinaka muduka na moce tiko ena kalasi .”
A dabe sobu ena nona idabedabe. “Io, kemuni. ”
A lako mai o Jekope kina nona koronivuli vou ena vica ga na macawa sa oti. E taleitaka me vuli, ka ra totoka na nona lewe ni kalasi. Ia e dua na leqa—e dau via moce tu ga! E yawa sara na nona koronivuli vou, sa dau mani yadra kina vakamataka lailai me yaco yani ena kena gauna.
Taumada, a rawarawa sara me vakanamata ena kalasi. Ia sa qai yaco me dredre cake tikoga. Ena so na gauna esa oca vakalevu saraga o Jekope ka mani moce lutu.
Ena siga ka tarava, a kerei Jekope kei rau na nona itubutubu na qasenivuli liu me ratou sota. A matadredredre ka kidavaki ratou ki na nona valenivolavola.
“Au marau ni dou sa tiko rawa,” a kaya o koya. “O Jekope e dua na gonevuli vinaka. Ia e kaya o nona qasenivuli ni sega ni taleitaka na nona kalasi. Ena so na gauna e sega ni dau vakanamata kina, ka vaka me dau oca vakalevu. “E daumaka tiko beka o koya?”
Deguvacu o tinana. “A cakacaka vakaukauwa o Jekope me rawa ni lako mai vuli eke, ia e yawa sara na neitou vale. E gadrevi me dau yadra vakamataka ena veisiga. Sa mani dau via moce voli kina ena nona kalasi ena mataka.”
“Oi, o koya ga ya?” a kaya o qasenivuli liu. “E vinaka mo tovolea na turu ni kofi! Biuta e vica na turu ni kofi kaukauwa sara ena gunu nei Jekope ena veimataka. Oqori ena vakayadrati koya tiko.
A mataruburubu o Jekope. “Ia na neitou matavuvale e sega ni gunu kofi, kemuni.”
A veilecayaki na qasenivuli liu. “Ena dredre vei iko mo vuli kevaka e dau lutu tikoga na nomu moce. E dodonu mo vakasamataka mada.”
Ni ratou sa biuta na valenivolavola nei qasenivuli liu, a veilecayaki na vakasama nei Jekope. E vinakata o koya me vinaka cake e koronivuli, ia a vinakata me muria talega na ivunau.
Ena bogi oya, e ratou a wilika na nona matavuvale na Vosa ni Vuku ena ivolanikalou.
Ena gauna me wiliwili kina o Jekope, a wilika, “Ia o ira kece na yalododonu era nanuma me ra maroroya ka vakayacora na veika oqo . . . ena vakavukui ka kila ka vakalevu. Io era na cici ka sega ni ceguoca, io era na lako tiko ka sega ni malumalumu mai ”*
A qai votu mai vua e dua na vakasama!
A tucake mai na nona idabedabe. “Me isosomi ni turu ni kofi, au na vakayagataka na turu ni vakabauta!”
“Na cava o tukuna tiko?” e taroga o tamana
E dredre o Jekope “Ena veimataka ni bera na katalau, e rawa ni tou masu ka kerea na Tamada Vakalomalagi me vakalougatataki au me‘u kakua kina ni moce. Na nodatou masu ena vaka na turu ni vakabauta!”
E rau dredre tale ga o Na kei Ta. “Oqori e dua na vakasama vinaka!” A kaya o Tamana.
Ena mataka ka tarava, e ratou a tekiduru na nodratou matavuvale ka cavuta e dua na masu me rawa kina vei Jekope me yadra tikoga. E ratou a cakava talega vakakina ena siga ka tarava. Kei na siga ka tarava yani oya. Ena veibogi, a tovolea o Jekope me moce vakayakavi talega. Ena veimataka e ratou sa vakabauta na matavuvale nei Jekope ni na vukei koya na Tamada Vakalomalagi.
Ni toso tiko na gauna, sa cakacaka mai na tuturu ni nodratou vakabauta. E rawa ni vakanamata o Jekope ena siga taucoko! Sa sauma na Kalou na nodratou masu. Ka sa kila o Jekope ni sa dokai koya na Kalou ena nona muria na Vosa ni Vuku.
“O sa vakarau ki na kalasi, Jekope?” A taroga o Mrs. Lelis ena dua na mataka ni sa curu yani ki na rumu ni vuli.
A deguvacu o Jekope ka matadredredre. A vakaturuma na nona vakabauta ni bera na vuli. Sa vakanamata tu o koya ki na veika kecega!
Droinitaka o Raquel Martín