“Na Toa kei na Luvenitoa,” iTokani, Maji 2024, 4–5.
Na Toa kei na Luvenitoa
“A vakamacalataka oqo o Jisu Karisito ena ivolanikalou,” a kaya o Ta.
Na italanoa oqo a yaco mai Amerika.
E ratou a wadravi Clara cake tu e lima na luvenitoa dromodromo vutivutia. Peep, peep, peep!
Ena vula itubutubu yadua e ratou dau voli luvenitoa na matavuvale i Clara me ratou mai susuga. Nikua a vukei Ta o koya me kauti iratou i vale me ratou laki tiko vata kei ira na vo ni luvenitoa.
E sukusukura na gaunisala e ratou vodo voli kina. E taura matua o Clara na kateni luvenitoa e sagana. E vakamasia vakamalua e dua vei ira ena ligana. E malumu dina!
Ni rau yaco i vale o Clara kei Ta, rau a taubale ki na valenitoa ena lomanibai e muri. Na valenitoa e dua na vale lailai era tiko kina na tinanitoa ka ra caka sova tiko kina.
“O cei na tinanitoa me daru biuta kina na luvenitoa qo?” A taroga o Ta.
A veiraiyaki o Clara. E dua na tinanitoa a kauta tiko eso na co madu ki na dua na ibinibini. Na co madu ena rawa ni caka kina e dua na sova malumu me baleta na luvenitoa vou. E rairai ena dua beka na tinanitoa vinaka o koya.
“O koya qo,” a kaya o Clara, ni dusia tiko na tinanitoa.
A laveta vakamalua o Ta e dua na luvenitoa mai na kateni ka biuta ena yasa ni tinanitoa. A vakaraica na luvenitoa na tinanitoa. A laveta cake na tabana, ka yali vakasauri na luvenitoa!
“A lako i vei? Se bula tiko beka na luvenitoa ?” A taroga o Clara.
A deguvacu o Ta. “Raica.”
A iro mai na ulu ni luvenitoa mai na ruku ni vutini tinanitoa.
“Na cava a cakava kina va oya na tinanitoa? A taroga o Clara.
“Me taqomaka na luvenitoa,” a kaya o Ta. “Ena taqomaka ka katakata vinaka ena ruku ni tabana.”
A vukei Ta o Clara me biuta na vo ni luvenitoa vei ira na tinatina vou. A laveta cake na tinanitoa na tabana me vakasoqoni ira kece vakavoleka.
“O kila, ni a vakamacalataka oqo o Jisu Karisito ena ivolanikalou,” a kaya o Ta.
“E dina?” A taroga o Clara. “Na cava e kaya o Koya?”
“Au na vakaraitaka vei iko.”
Rau a lako o Clara kei Ta ki loma ni vale. A kauta mai o Ta na nona ivolanikalou. Sa tekivu wiliwili sara.
“Au sa nanuma vakavica meu vakasoqoni kemuni vata me vaka na toa yalewa sa vakasoqoni ira na luvena e ruku ni tabana, kevaka koni sa veivutuni ka lesu mai vei au ena lomamuni taucoko.”*
A vakasamataki ira yadua na luvenitoa o Clara ena ruku ni tabanana na tinanitoa. “Oi sa dau vakasoqoni keda vata o Jisu me vaka na luveninitoa ena ruku ni tabana?” A taroga o Clara.
“E donu qori,” a kaya o Ta. “E dau taqomaki keda, me vaka ga na tinanitoa e taqomaki ira na luvenitoa. E levu sara na ka e taqomaki keda mai kina o Koya ka sega ni batabata walega. E kila o Koya ni da mavoa se tauvimate se rarawa. E solia vei keda na vakacegu kei na nuidei. Sa kauwaitaki keda o Koya.”
Ena mataka ka tarava, a vakania o Clara na tinanitoa kei na luvenitoa vou. E vakavuna me vakasamataka na ivolanikalou a wilika o Ta. A matadredredre ni vakasamataki Jisu. E kila ni lomani koya ka kauwaitaki koya, me vaka na tinanitoa ka dau kauwaitaki ira na luvenitoa.
Droini mai vei Assia Ieradi