“Muduka o Janeelyn na Nona Sarasara,” iTokani, Maji 2024, 36–37.
Mukuka o Janeelyn na Nona Sarasara
A vinakata sara ga o koya me raica na vidio ka tarava. Kei koya ka tarava. Kei koya ka tarava.
A yaco na italanoa oqo mai Malaysia.
A tosoya na nona sikirini ni talevoni e nona iqaqalo levu o Janeelyn. Era veitasivi pasi na vidio. A cegu me sarava e dua, sa qai tomana tale. A qai tu vakadua ena dua tale na vidio. E a levu sara na vosa ca, ia a lasa, ka tomana tikoga na nona sarasara. Ka qai toso tokaga na nona sarasara.
“Janeelyn! O vinakata mo mai droini?” A yalovaka yani vua e dua na tiki ni pepa na tacina gone o Jojo.
A rai cake mai o Janeelyn. “Sega ni gauna sara ga oqo.”
“Sa donu.” A matacudrucudru o Jojo ka biuta sobu na pepa.
Vakararai. Vakararai. Vakararai. Vidio ni manumanu matavinaka. Na nodra vidio na tamata kilai levu. Na vidio ni nodra danisi na gone. Kei na vica na vidio a kila o Janeelyn ni sega ni vinaka me saravi. Io, e rairai sivia beka na vica. Sa tekivu me vakila o Janeelyn ni dodonu me sa tarova na nona sarava tiko.
Ia era biuta cake talega na tamata e levu na ka vinaka, a nanuma o koya. E a vulica sara mada ga mai kina o koya na sala vovou me droini kina mai na vica na vidio.
“Janeelyn,” a kaci o Na.
“Io?” A sega mada ga ni rai cake mai o Janeelyn ena gauna oqo.
“Kedatou na kana raisi tavuteke vata kei na kakana ni waitui nikua ,” a kaya o Na. “E rawa nio vukei au kina?”
E dau taleitaka o Janeelyn na raisi tavuteke kei na kakana ni waitui. Ia sega ni vinakata me tucake sara ga ena gauna oqo.
“E rawa beka ni‘u qai vakarautaka ga na teveli?” a taroga. “Au rawa ni qai veivuke talega ena masi iyaya ni kana ni oti.”
“Sa donu,” a kaya o Tinana. “Ia ena gadrevi mo mai vakarau sara ga ena gauna ga au kerea yani kina. Ka sa gauna talega me na soli lesu tale mai kina na talevoni. Sa donu ya?”
“Donu ,” a kaya o Janeelyn.
A sara vidio tikoga o Janeelyn. Vakadua tale, a nanuma o koya ni sega ni dodonu me sarava tiko. Ia a vinakata sara ga me raica na vidio ka tarava. Kei koya ka tarava. Kei koya ka tarava. Vakararai. Vakararai. Esa dredre me tarovi!
Oti sa qai biuta sobu o Janeelyn na talevoni. Ia, de vinaka me vakacavara e dua tale na iotioti ni vidio . . . .
Sega, a tukuna vakaidina o Janeelyn. A vakauqeti koya na Yalo Tabu, ka vinakata me vakarorogo. Se toka volekata toka ga na talevoni na ligana. Sa ka veitemaki dina! A bobo vakaukauwa na matana o Janeelyn.
Tamai Keimami Vakalomalagi lomani, a masu lo o koya. Au tovolea tiko vakaukauwa me‘u vakarorogo ki na Yalo Tabu, ia au gadreva na veivuke. Au via muduka na noqu sarava na vidio oqo, ia au sega ni kila se me‘u cakava vakacava. Ena yacai Jisu Karisito, emeni.
Ni oti ga oya, sa kacivi koya o Na me vakarautaka na teveli. A kiso cake o Janeelyn ka matadredredre. Oqori sara ga e dua na sala me vukei kina me kauti koya tani mai na talevoni.
A tuva o Janeelyn na peleti ena teveli. “Na, au a raica eso na ka ca ena talevoni,” a kaya mai o koya.
A rai cake mai o Na mai na nona vakasasaqa. “Na mataqali ka cava?”
“Me vaka ga, na vosa ca kei na vidio ca .” A kuretaki taba o Janeelyn. “Ia e sega ni ca taucoko.”
“Na cava o a cakava ni o raica na veika ca?” A taroga o Na.
A vagagalu mada vakalailai o Janeelyn. A biuta o koya e dua na bilo ena veivanua ni kana yadua.
“Au a sarava tiko ga,” a kaya. “Au sega ni kila na vuna. Ia a tukuna vei au na Yalo Tabu me‘u muduka, ka‘u mani cabora e dua na masu ni kere veivuke.”
A biuta o Na e dua na peleti katakata ni raisi vakakakana ni waitui tavuteke ena teveli. “Ena so na gauna e dau dredre sara me da kakua ni cakava na veika eda kila ni ra ca,” e kaya o koya. “Ni yaco oya, na ka vinaka duadua eda rawa ni cakava sa ikoya me da masu.”
E sige o Janeelyn. “Kena ibalebale ni dodonu na ka au cakava.”
“O dina sara ga.” A solia o Na vei Janeelyn na itaki me biuta ena teveli. “Ia e sega ni ca taucoko na initaneti. E rawa ni vukei keda me da sema kei ira na itokani ka wasea na veivakasama eso. Ia e rawa ni dredre me da dro tani mai na veika ca kecega. Ena gauna oqo ka lako yani, kevaka o na sarava na vidio, me daru saravi ira vata. Ena sala oqori keirau rawa ni veivuke kina kei Ta kevaka o raica e dua na ka ca.”
A deguvacu o Janeelyn. Ena gauna e tarava ena sara vidio kei Na kei Ta. Ia me yacova na gauna oya, e levu na ka lasa e rawa ni cakava ke sega na talevoni.
“E rawa beka ni o tukuna vei ira kece ni sa gauna ni vakayakavi?” A taroga o Na.
“Io! Ni oti na vakayakavi, au sa na droini kei Jojo!”
Droini mai vei Mitch Miller