“Na Veitalanoa kei Wili me Baleta na Nodra Vukei o ira na iSenivalu,” iTokani, Maji 2024, 40–41.

Na Veitalanoa kei Wili me Baleta na Nodra Vukei o ira na iSenivalu

O Wili e tiko mai Pennsylvania, Amerika. Keirau a tarogi koya ena so na taro me baleta e dua na cakacaka a cakava me vukei ira kina na tani.

Vakamacalataki iko mada.

Au sa yabaki 11. Au dau taleitaka na qito soka kei na lacrosse, vavi kuki, qalo, vakasisisi, kei na rolaskait. Au dau taba piano talega kei na vaiolini. Na noqu roka taleitaki na karakarawa buto, kei na kakana taleitaki na yaloka (qasi, tavuteke, saqa matua—au taleitaka taucoko!). Niu tubu cake, au vinakata me‘u na vuniwai me vakataki tamaqu.

Na cava e vakavuna na nomu via veivuke?

Au a rogoca nira sa dro mera bula e vuqa na matavuvale mai na dua tale na matanitu. Eso vei ira era sa toki mai kina dua na vanua voleka toka. Au vakasamataka sara, “Meu na vukei ira vakacava?”

Au a masu meu kila na sala me‘u veivuke kina. Qai ciqoma o tinaqu e dua na imeli mai na iSoqosoqo ni Veivukei ni iteki. Era a kerekere voli vei ira na tamata ke rawa ni ra soli iyaya yani mera vukei kina na isenivalu. Au kila sara ga ni sa saumi na noqu masu!

O veivuke vakacava?”

Au dau taleitaka na vavavi (noqu mesamesa na kuki) ka‘u mani nanuma me‘u volitaki kuki me‘u rawa ilavo kina vei ira na veimatavuvale oqo. Au vola na kena pepa tikidua au vodo wavoki ena noqu rolaskait me veisoliyaka yani. A lako talega mai na noqu koli, o Coco.

E vuqa vei ira na wekaqu era maqusa me ra volia na noqu kuki. Ena ilavo au rawata, au a voli kuro kei na itavuteke me noqu cau.

Na cava o a vakila?

A marau na yaloqu ni‘u kila ni rawa ni ra vakasasaqa na veimatavuvale oqo ena kuro kei na itavuteke. Au rawa ni raitayaloyalotaka na kena veivakacegu na kakana saqa e vale ni o tiko ena dua na matanitu vou.

Au vulica ena Lalai ni “ko ni sa qaravi Koya tiko na nomuni Kalou, ena nomuni qaravi ira tiko na wekamuni” (Mosaia 2:17 Au vakila na loloma ni Tamada Vakalomalagi vei au kei ira na tamata era toso tiko mai kina noqu yasayasa.

Na ivakasala cava o na solia vua e dua e via veivuke?

Vakaraica na sala eso mo veiqaravi kina ena nomu tabanalevu se iteki. E rawa talega ni o veivuke ena dua na vanua ni vakaruru ena nomu vanua. E tiko na sala me da veivuke wavoki kina!