“Kappukot Zaion im Kōjeraam̧m̧an ko an Irooj” N̄an Kōkajoorļo̧k Jodikdik ro Jept. 2021, 2-5.
Itok Ļoor Eō
Kappukot Zaion im Kōjeraam̧m̧an ko an Irooj
Kalōk Zaion ej juon eddo eļap, bōtaab ej barāinwōt boktok eļap jineekjej ko.
M̧ool eo m̧oktata eļap an aelōn̄ in lan̄ ej bwe Anij ej iakwe kōj kōn aolepān Buruōn, maron̄, ļōmņak, im kajoor. Ekōņaan men eo em̧m̧antata n̄an kōj—E ekar aolep iien, im Enaaj aolep iien. E ej kōņaan bwe jen m̧ōņōņō; ejjab ilo jidik wōt iien ak ilo kalimjōke, ak eļap jān jon̄an im m̧ōnōņō n̄an indeeo āinwōt E. E ej kōņaan bwe jen eddōkļo̧k im tōpar kōjatdikdik kwojarjar eo ad āinwōt ļaddik eo ak leddik eo wot nejin Anij.
Ijeļā menin ejjab aolep iien pidodo. Elōn̄ iaami ej jelm̧ae apan̄ ko im mālijjon̄ ko an juon make me remaron̄ jet iien tōr jān jon̄an. Em̧ōj am̧ bōlen kalimjōk jekjek kein am̧ make, jet ilo jon̄ak ko ilo baam̧le eo am̧ make, ak būraabļōm̧ ko ilo laļ ko ipeļaakin laļ in, im bwilōn̄, “Ekōjkan aō maron̄ eļļā ibuļōn̄ lōkapokpok in māllijon̄ kein?” Juon uwaak emaron̄ kailbōk eok: Kappukot n̄an kalōk Zaion.
Ewi Zaion?
Kwoj Iakwe Eō Eļapļo̧k Jān Rein Ke?, jān David Lindsley
Ilo aolepān bwebwenato aolep iien Anij ekar kūr armej ro an n̄an kalōk Zaion. Ekar juon jikin eo ekkā an armej ro an Anij remaron̄ kar anjo̧ jān kareel eo an laļ in im mour ilo jokkun wōt juon ippān doon. Bōtaab ilo epepen in eļap āliktata, Zaion ejjab n̄an baj juon wōt jikin. Ilo raan kein ad, Zaion emaron̄ jabdewōt jikin juon membōr etiljek jān Kabun̄ eo an Jisōs Kraist im Armej ro Rekwojarjar ilo Raan Ko Āliktata ej pād ie. Irooj ej kōmeļeļeik armej rein an Zaion āinwōt “juon wōt ilo bōro im juon wōt ilo ļōmņak” (Moses 7:18) im “erreo burueer” (Katak im Bujen Ko 97:21). Ilo tukadu, ejako ad ļōmņak kōn Zaion āinwōt ia eo jej tōn mour ie ak ej wāween ad naaj tōn mour.
Elōn̄ kōjeraam̧m̧an ko rekabwilōn̄llōn̄ repojak n̄an kwe ilo am̧ kōm̧m̧ane ijo em̧m̧an koņaam̧ n̄an kalōk Zaion, n̄an erom̧ armej eo Rilo̧mo̧o̧r aikuji eok n̄an erom̧, im n̄an jipan̄ kōpooj iaļ eo n̄an jepļaaktok eo An n̄an laļ in. Kijejeto rōt in ebōk jerbal im tōmak eļap, ak enaaj barāinwōt boktok m̧ōņōņō im lan̄lōn̄ ejjeļo̧k jem̧ļo̧kin. Ij kōjatdikdik bwe kwonaaj kalimjōk menin āinwōt juon men eo ekōm̧akūt im kaitoktok limo āinwōt aō kalimjōke! Āinwōt an kar Būreejtōn Russell M. Nelson kar katakin, ejjeļo̧k—lukkuun ejjeļo̧k—emaron̄ ļapļo̧k an aorōk.1 Im jej maron̄ bōk koņaad! Jej ritariņae ro ilo m̧aan ļain ko kōn m̧ool. Jejjab ebbōk jōōt ko ippād; jej bōk ippād kaaje in kinej ko! Em̧ōj kūr kōj n̄an jipan̄ kōmour laļ in im kōm̧m̧ane juon doulul eļap in armej ipeļaakin laļ in rej kuk n̄an jar ijo Rilo̧mo̧o̧r emaron̄ itok n̄ane.
Iakwe Anij im Ritūrum̧
Jemaron̄ tōprak ilo bōk jekjek in kain baam̧le ak jukjuk in pād eo ak juon laļ eļap ilo ad kōjparok kien eo n̄an iakwe. Im jon̄an wōt an ļapļo̧k ad iakwe Anij, enaaj ļapļo̧k ad naaj iakwe ro ritūrid im loe wāween ko jemaron̄ kōjeraam̧m̧an er. Ewōr ro ritūrid n̄an jipan̄, rijeram̧ōl ro n̄an kotak, im men eo em̧m̧an n̄an kōm̧m̧ane aolep jikin.
Irooj ekar kōmeļeļeik m̧oktaļo̧k eddo in im kōjeraam̧m̧an in ilo jekjek in:
“Kōn menin, kwōn niknik; … rie ro reban, kotak lōn̄ļo̧k pā ko rej allitoto, im kōkajoorļo̧k bukwe ko rem̧ōjņo̧.
“Im eļan̄n̄e kwōj niknik n̄an jem̧ļo̧kin kwonaaj bōk juon kūrawūn in jab wabanban, im mour indeeo ilo im̧ōn irooj ko Iaar kōpooji ilo m̧weo im̧ōn Jema” (Katak im Bujen Ko 81:5–6).
Jutak kōn M̧ool eo
N̄e Anij ej kūr kōj n̄an kalōk Zaion, Ej kūr kōj n̄an jutak kōn katak ko An im n̄an dim ilo tōmak eo ad. Menin eban pidodo aolep iien ak maron̄ koņ n̄an kom̧m̧ane, ak jej aikuj kom̧m̧ane—kōn tūriam̧o, ettā, meļeļe, im iakwe em̧ool n̄an ro jet. Ilo ad kappukot n̄an kalōk Zaion, jenaaj ilo m̧ool ioon ro me emaron̄ jab jejjōt kalimjōk er ak aer nuknuk ak aer m̧akūtkūt. N̄e jej ioon armej rōt in, jej aikuj kōkm̧anm̧an n̄an uwaak ilo jim̧we, ejjab ilo ekajet. Ilo jekjek rōt kein men eo em̧m̧antata jemaron̄ kōm̧m̧ane ej n̄an kajim̧we ad make makūtkūt im kwaļo̧k “iakwe jab ankilaan riab” n̄an er (lale Katak im Bujen Ko 121:41).
Ikōņaan bwe ro jet ren m̧ōņōņō ilo kōjeraam̧m̧an ko ewōr ippa, ak jet iien ij ļōmņak kōn wāween kwaļo̧ki ilo juon wāween eo me reban illu ak jab meļeļe. Eoon in ejipan̄ eō ilo aolep kūr ko aō ilo Kabun̄ in im eddo ko aō make āinwōt juon rikaļoor an Kraist.
“Kōn menin, em̧ool Ij ba n̄an kom̧ro, kotak ainikiōmiro n̄an armej rein; ekkōnono ļōmņak ko Inaaj likūt ilo būruōmiro, im kom̧ ro jamin naaj pok im̧aan armej raņ;
“Bwe naaj lewōj e n̄an kom̧ro ilo ejja awa eo wōt, aaet, ilo iien eo wōt, ta kom̧ro naaj ba.
“A juon kien Ij lewōj n̄an kom̧ro, bwe kom̧ro en kwaļo̧k jabdewōt men kom̧ro ej kwaļo̧k ilo Eta, ilo lukkuun m̧ool in bōro, ilo jitōbōn ettā, ilo aolep men ko otemjeļo̧k.
“Im Ij lewōj n̄an kom̧ro kallim̧ur in, bwe toun wōt amiro kōm̧m̧ane men in Jetōb Kwōjarjar enaaj ererakļo̧k ilo kwaļo̧k kam̧ool eo n̄an aolep men ko otemjej kom̧ro naaj ba” (Katak im Bujen Ko 100:5–8).
Juon Kōjeraam̧m̧an ej Bun̄ M̧aanļo̧k Wōt
Ro m̧ōtta reddik rejitōboro, enaaj wōr raan ko rekapan̄pan̄ im̧aan, ak mour eo am̧ ejjab to ej pojen lukkuun aiboojoj ilo am̧ lelo̧k būruom̧ n̄an Anij, iakwe Irooj Jisōs Kraist, im kōm̧m̧ane ijo koņaam̧ em̧m̧antata. Elan̄n̄e kwoj tiljek, Zaion enaaj pād jabdewōt jikin kwoj pād ie. Ij kōjeraam̧m̧an kom̧ n̄an bōke ilo lan̄lōn̄. Ewōr ippān Irooj kōjeraam̧m̧an ko reļļap em̧ōj an kōpooje n̄an eok.