Ikar Jab Tōprak ilo Tiim in Tuuj eo

Jān Emily Joy Thompson

Māākjiin ko an Kabun̄ in

Eta ekar jab pād ilo laajrak eo. Iaar inepata. Ak Irooj eaar katakin eō juon men.

Kōmeļeļe ko jān Gabriele Cracolici

Ikar iakwe tuuj jān ke ikar jilu. Kōn menin ke ikar pād ilo middle school, ikar m̧ōņōņō ke ekar ijjinoe kōmālmel ko n̄an tiim in tuuj eo. Ekar ejjeļo̧k aō bele bwe kōn taļōn im jeļā eo aō, enij pidodo aō pād ilo tiim eo.

Jejjo raan tokālik in kōmālmel ko, et ko etan tiim eo rekar kaddepi. Ikar bwilōn̄, ikar jab loe eta jabdewōt jikin ilo laajrak eo. Iaar ienpata. Ikar etal n̄an m̧weo im kar jan̄ ilo peed eo aō. Ikar illu ippān rikaki in tuuj eo im kar inepata bwe ikar jab maron̄ tōprak ilo tiim eo. Jin̄ō ekar itok n̄an ruum̧ eo aō im letok juon ļōmņak bwe in kajjitōk ippān Jemedwōj Ilan̄ n̄an letok kajoor n̄an wōnm̧aanļo̧k wōt ilo “ekkaj” in ilo mour eo aō. Ikar errā ilo aō jab kōņaan, im ikar jar juon jar ekadu. Ālikin jar eo ikar jab en̄jake an em̧m̧anļo̧k aō bed, kōn menin ikar wōnm̧aanļo̧k wōt ilo aō jan̄ im būrom̧ōj. Ekar lukkuun nana aō kiki bon̄in eo.

Jibbon̄ōn eo tok juon ikar make kajutak eō jān jikin kiki. Emeemļo̧k in ao jab tōprak ekar kāāl ilo kōļmenļo̧kijeņ eo aō, im ikar kōņaan bar ro̧o̧ļo̧k n̄an ium̧win ko̧o̧j eo aō. Ak m̧okta jān aō kar kōm̧m̧ane, ikar kemeemej juon kallim̧ūr bisop eo aō ekar kōm̧m̧ane. Ekar ba bwe eļan̄n̄e inaaj riiti jeje ko rekwojarjar aolep raan, men̄e 15 wōt minit ko, innem inaaj jeram̧m̧an. Eļan̄n̄e ikar aikuji juon kōjeraam̧m̧an, ej tōrein.

Ilo aō riiti, ikar lo juon eoon ilo Katak im Bujen ko:

“Em̧ool Ij ba n̄an kom̧ ro jera, jab mijak, būruōmi ren ineem̧m̧an; aaet, m̧ōņōņō iien otemjej, im ilo men otemjej leļo̧k kam̧m̧oolol;

“Kom̧in kōttar Irooj ilo kijenmej, bwe jar ko ami rekar deļo̧n̄ ilo lo̧jiln̄in Irooj in Sabaoth, im em̧ōj ļo̧o̧ki kōn sil im kam̧ool in—Irooj Eaar kallim̧ur im kean̄ bwe naaj leļo̧k uwaakier.

“Kōn menin, Ej lewōj kallim̧ur in n̄an kom̧, kōn juon bujen eo ej jamin oktak bwe renaaj kūrm̧ool; im aolep men ko kom̧ ar en̄taan kaki renaaj jerbal ippān doon n̄an em̧m̧an eo ami, im n̄an aiboojoj eo an Eta, Irooj ej ba.” (Katak im Bujen Ko 98:1–3).

Iaar ilbōk. Ikar kōņak nuknuk in kiki ko aō im jijet ippān an pok bōra im ļo̧kjeņ aō kōn jon̄an aō kar aikuji eoon kein. Aolepān en̄jake in illu im būrum̧ōj kar kwaļiļo̧k ilo eoon kein. Ikar en̄jake iakwe eo an Jemedwōj Ilan̄ im kar jeļā bwe E ejeļā ta eo ij jelm̧aiki. Kōn jipadpad in ekāāl, ikar maron̄ loe bwe jab kālet eō n̄an tiim in tuuj eo ear juon ekkaj jidikdik ilo iaļ eo ilo mour eo aō. Ikar jubkwe ilo kam̧m̧oolol im kam̧m̧oolol Jemedwōj Ilan̄.

Ilowaanļo̧k aolepān raan eo, ikar maron̄ dāpij Jetōb eo ipa im kalimjōkļo̧k māllijon̄ ko aō āinwōt iien ko rem̧m̧an n̄an eddōkļo̧k. Aolep iien inaaj kaorōk eoon kein. Im inaaj kemeemej kallim̧ūr eo an bisop eo aō kōn kōjeraam̧m̧an ko kōn jitlo̧k n̄an jeje ko rekwojarjar. Ij m̧ōnōņō bwe ij juon membōr in Kabun̄ in im ewōr aō jeļāļo̧kjeņ kōn gospel in. Ijeļā bwe karōk eo an Jemedwōj Ilan̄ ej n̄an kōj ej ilo m̧ool juon karōk in m̧ōņōņō.

Men Otemjej Renaaj Jerbal

“Jejeļā bwe apan̄ ko, inepata ko, im būrom̧ōj ko renaaj itok n̄an kōj kajjojo ilo elōn̄ wāween ko, bōtaab jej barāinwōt jeļā bwe ilo jem̧ļo̧k in, kōnke kōn Rijojomar eo ekwojarjar, aolep men remaron̄ in kōm̧m̧an n̄an aer jerbal ippān doon n̄an em̧m̧an ko ad. [lale Katak im Bujen Ko 90:24; 98:3]. Ej kōn tōmak eo kar kwaļo̧k ilo lukkuun ļam waan jān Būreejtōn Gordon B. Hinckley (1910–2008) ke ekōn ba, ‘Men ko renaaj jerbal.’ N̄e jej iien otemjej keememej Rilo̧mo̧o̧r eo, jemaron̄ ‘kōm̧m̧ane aolep men ilo lem̧ōņōņō me rej pād ilo kajoor eo ad,’ [lale Katak im Bujen Ko 123:16–17], lōke bwe kajoor eo An im iakwe eo An n̄an kōj enaaj lo kōj.”

Elder D. Todd Christofferson jān Doulul eo an Jon̄oulruo Rijilōk ro, “To Always Remember Him,” Ensign, Apr. 2011, 55.

Jino juon Laajrak in Im̧we

N̄e jej kappukot jipan̄ ilo jeje ko rekwojarjar, emakijkij an jab to ad loe juon eoon me jej kile bwe kar jeiki n̄an kōj wōt. Jet iien emaron̄ bōk jidik iien aitok n̄an loe juon eoon me ej kōnono n̄an kōj ilo jekjek rōt in. Juon wāween n̄an kappukot jipan̄ eo kwoj aikuji n̄e kwoj aikuji ej kōm̧m̧ane juon “laajrak in im̧we.”

N̄e kwoj ekkatak jān jeje ko rekwojarjar, lale eoon ko ewōr kallim̧ūr ak naan in rojan̄ ko ie me remaron̄ jipan̄ eok ak ro jet kōn māllijon̄ im apan̄ ko aer ilju im jakļaj. Kōkaļļeik eoon kein im kōjparok juon laajrakier emaron̄ lewaj n̄an eok kajoor eo kwonaaj aikuji n̄e kwoj m̧ojņo̧. N̄an bar jipan̄, karōki eoon ko n̄an laajrak ko reoktak jān doon ekkar n̄an ta apan̄ ko rekkar n̄ani. Ilo wāween in, kwonaaj iien otemjej wōr ippam̧ kallim̧ur ko an jeje ko rekwojarjar im kōjeraam̧m̧an ko repojak n̄an am̧ riiti n̄e kwoj aikuji er.